距離《猛將傳》不足半年，光榮話咁快又推出旗下必賣作《真．三國無雙3》，香港行貨重比日本水貨早兩日派貨，食晒水貨頭啖湯。嚟到新一集除理所當然地強化畫面及新加武將外，更將最好玩嘅「無雙模式」大幅改頭換面，以及加入自創武將等新玩法，加上超過四十位三國武將及升級要素，務求機迷再一次乖乖投降付錢。
記者、攝影：徐影龍
無雙模式可謂《真．三國無雙》系列最精粹之處，過往表達方式為每名武將都有其獨立故事，唔會打餐飽都唔知為乜。今集無雙模式更作出大幅改動，首先唔再以人物作區分，而係分成魏、蜀、吳三大勢力，挑選後就可進入劇情。
如蜀國第一章就以纖滅黃巾賊為主，打之前重會播放劉關張桃園結義嘅經典動畫，而且符合特定條件，重有隱藏外傳情節發生，令到故事推進更為壯大精采，玩起上嚟零舍投入。以挑選勢力作無雙模式攻略，另一好處係可選擇唔同嘅武將出陣，唔似之前需要同一武將打足七關，而且重可因應武將能力作針對式攻略，打多幾次都冇咁易會悶，打爆某勢力之後，重會有董卓、呂布、南蠻等其他勢力可供選擇。
喺攻擊方面亦加入唔少新元素，除已有嘅無雙亂舞、真．無雙亂舞及二人合力嘅激．無雙亂舞外，重新加入反擊（L1擋格後按△）、格鬥Game先有嘅「受身」（空中按L1）及「一騎討」隻抽攻擊模式。最過癮係「名乘」（按R3），即場向住大堆敵人響朵嗌自己個名，中招者會呆在當場任你魚肉，不過使出「名乘」時會毫無防禦，對住大佬級敵人都係少用為妙。新加人物有三名，包括諸葛亮之妻月英、合肥之戰中救出孫權嘅周泰、及曹操兄弟曹仁，照例滿足特定條件就可使用。順帶一提，今集提供一個快速檢視副將嘅功能，首先戰鬥中按「Start」，喺軍團情報中選擇其中一位武將，就可檢視其屬下副將嘅位置，令控制局勢更為方便及易於掌握，要全滅武將賺經驗值都方便得多。
今集加入如《三國志III》嘅自創武將模式，可任意創造啱心水武將，設定包括髮型、服飾、武器等，連改名都可用全中文，以後力戰呂布唔再局限於三英，整番場布殊對呂布都幾盞鬼。網上流傳自製勁人嘅設定，如揀女性、束髮、短褲及細劍，就可創做傳說中嘅女媧，筆者依法炮製後，雖女媧外貌不同舊作，不過其無雙亂舞就十分相似，基本能力值亦不俗，可信程度頗高。
舊作最令人費寢忘餐，要算第四同第五武器嘅獲得方法。今集武器採經驗值升級制，殺敵愈多武器等級愈高，能力亦相應提高。不過到LV9就唔會再升，要引發特殊情節先可獲得LV10終極武器，如呂布嘅無雙方天戟等。
勁作果然與眾不同，喺灣仔東方188入面，有啲Game舖擺隻《真．三國無雙3》出嚟任人試玩，即時引嚟十幾二十人圍觀，個個睇到唔捨得走，玩嗰個更係肉緊非常。據其中一Game舖透露，短短兩日已賣出三百幾隻《真．三國無雙3》，的確係勁！隻Game夠人氣，連記者都受惠，三兩下手勢就做完機迷訪問！
今次《真．三國無雙3》將會推出特別版TreasureBox，以附送大堆頭精品為號召，除Game外重包括W-Force秘傳攻略、武將資料集、年曆、無雙啤牌、16張武將卡及音樂CD等，定價12,800日圓（約港幣$850）。而行貨TreasureBox跟台灣一樣，內容跟日本版大致相同，不過就多咗件T-Shirt，賣價未定，不過據小道消息透露，TreasureBox貨源充足，未必會炒得起。雖然TreasureBox極為吸引，不過仍未有貨，普通版於上星期六已派貨落場，令到好多Fans心急如焚，都唔知等唔等特別版好，有啲重忍唔住索性買隻普通版頂住癮先。
售賣點：DreamStore
地址：灣仔東方188商場256號舖（25753285）
深水埗黃金商場地面13A2（23619699）
為推高《真．三國無雙3》人氣，今次重金禮聘以《細數你的吻》紅遍日本嘅小柳由紀唱主題曲《CrossColor》，歌曲將收錄係3月5日推出嘅Single《OnTheRadio》內，賣價連稅1,050日圓（約港幣$70）。想先聽為快，可到其官方網址免費試聽。
免費試聽網址：
遊戲類型：動作
對應機種：PS2（支援硬碟）
遊玩人數：1至2人
開發商：光榮 (c)2003KOEICo.,Ltd.