美股大跌，北韓又試射導彈，搞到港股噚日一度急瀉136點，低見9103，收報9148，跌90點。
3月期指跌破9000水平，未來一個月，利淡消息陸續有來，其中最貼身就係3月5日阿松公布嘅財政預算案，市場最近流傳一個故事，話港府若無力減財赤，對沖基金會在當晚開火衝擊港元。現時咁嘅環境，真係想搵個睇好嘅理由都唔易。ｉ師傅話聽聞有美資大戶喺場外期權造淡，準備玩嘢。
粵海系3股噚日停牌，粵海投資（270）公布洽售粵海制革（1058）及粵海啤酒（124）畀母公司廣東控股嘅新進展。不過，無論進展如何，今次交易對小股東冇乜着數，皆因廣東控股唔會對粵海制革及粵海啤酒提出全面收購，而且兩股早已因為收購消息炒過龍，股價唔易再大升。
不過，大家可以留意粵投，因為市場重未消化可能獲母公司注入東江水嘅消息。東江水有港府買水保證，收入穩定，可作為資金避難所，足以令粵投變成基金愛股。現時雖未知母公司以乜嘢價錢注入，但阿虎唔擔心價錢，只係擔心廣東控股唔捨得將條肥水讓畀粵投。
亨泰消費品（197）超額配股權2500萬股獲悉數行使，令配股數目增至1億股，反映圍飛者夠實力，股價即時炒上，升4.7%，收0.67元。黑客話，1億股都消化到，後市應有一番炒作，可以留意。
國潤控股（175）國內汽車合作夥伴吉利汽車遭日本豐田控告侵權，豐田話吉利美日轎車的商標與豐田相似，吉利則全力抗辯。呢單官司可能有排搞，隨時會影響到與國潤的汽車合營計劃。國潤股價噚日已開始腳軟，股價跌近5%，收0.59元。
阿虎