我求大俠終於明白點解艾辛莫域喺熱刺冇正選打，事關佢可以喺門前幾碼射失，試問屎波成咁，你叫熱刺領隊荷杜點敢用佢呀！
熱刺喺前晚場波由三十八分鐘開始就十一個打十個（𠳔哋件安達頓喺七十三分鐘先被逐），如果唔係後備入替嘅艾辛莫域唔生性，喺六十四分鐘離門六碼射失，熱刺最後可以贏波都唔定。
雖然荷杜賽後冇直接話艾辛莫域要負上和波嘅責任，但就好寸咁話：「艾辛莫域係個非常之好技術嘅球員，所以我哋全隊都好唔明點解佢會唔入。」
查實艾辛莫域今屆喺熱刺經已唔係正選，𠵱家重搞單咁嘅嘢，如果熱刺季尾攞唔到下屆足協盃資格，荷杜分分鐘入晒佢數；咪話我求大俠唔教精佢，趁熱刺𠵱家傷兵多，重唔珍惜出場機會，因住季尾冇得留低呀！
英超下游球隊韋斯咸喺星期日啱啱贏咗西布朗，士氣本來應該唔錯，點知突然傳出球會唔同老將迪肯尼奧續約，迪肯尼奧重大罵領隊羅達！迪肯尼奧喺星期日唔滿意被換出，佢話：「我咁大個人唔通唔知自己有冇傷？呢啲簡直係佢哋嘅陰謀，佢哋表明今季結束後唔同我續約，𠵱家又話我傷，咁即係斷我米路啫！」
意甲尾二球會拖連奴喺星期一將教練烏拉維利炒魷，不過就冇講原因。路邊社消息就話可能因為拖連奴球迷放火搞事，球會想息事寧人，所以炒咗烏拉維利。其實，拖連奴目前成績咁差，烏拉維利都算抵炒；如果球會以為咁樣球迷就唔搞事，就似乎天真咗啲。只要球會成績好，球迷就自然乖啦！
愛華頓嘅足球神童朗尼除咗以萬五鎊周薪同球會續約及成為英格蘭大國腳之外，重透過肖像權而袋咗成百萬鎊。事緣每賣出一件印佢個姓同號數嘅愛華頓球衣，佢就分到三鎊，聽講連埋東南亞個市場足足賣咗三十萬件，所以朗尼有近百萬鎊落袋。朗尼𠵱家咁易就搵到錢，希望佢唔會因為咁而沖昏頭腦啦！
𠵱家本港打緊嘅東亞盃足球預賽，足總為吸引球迷入場，喺每個賽日都會抽出一位現場觀眾，送出總值萬二蚊嘅橫濱雙人四日三夜機票連食宿套票，喺五月去日本睇東亞盃決賽周。唔好話我求大俠唔益大家，今日大球場兩場波冇主隊份，入場球迷可能得一百幾十，以廿蚊一張飛計，買佢十零廿張都係幾嚿水，分分鐘中獎免費旅遊。