近排城中熱話非豪宅新盤莫屬，但係究竟有幾旺，睇兩大龍頭代理行有幾多佣金落袋就知。中原老闆施永青，噚日新鮮熱辣親筆寫咗份激勵士氣嘅成績表，佢話淨係上個禮拜六日，集團佣金多咗成千萬，部份嚟自當旺嘅豪宅盤。老施話，資金流入地產市場日益明顯，係樓市轉強嘅訊號，叫手足們繼續努力。
中原集團佣金排行榜中，頭十名分行，大部份由豪組包辦，例如又一村、淺水灣、大埔康樂園等。利嘉閣嘅何文田同薄扶林碧瑤灣行就名列三甲內。
至於美聯張錦成亦出稿晒冷，話今個月到二十四號為止，已經有八間分行營業額破百萬元水位，而且全部係做豪宅嘅，最好成績係何文田分行，有138萬數，沙田火炭駿景園分行則135萬。