近排喺日本播緊嘅古裝電視劇《武藏》，由市川新之助扮演文武雙全嘅劍聖宮本武藏，市川被人揭發有私生女，加上同女主角米倉涼子傳緋聞，即時成為新聞人物。其實武藏呢個日本家傳戶曉嘅人物，曾經俾好多日本出名漫畫家繪畫成漫畫人物，當中最搞鬼嘅都算係手塚治虫嗰個版本。
已故「漫畫之神」手塚治虫，喺五八年已經將武藏畫成漫畫，當中武藏嘅宿敵小次郎亦有出現，不過由於手塚呢個漫畫係畫畀小學生睇，所以就冇畫到佢哋嘅暴力格劍場面，相反替兩位古裝人物着上時裝，重變成兩個人一齊鬥做成功嘅動畫家，認真頂癮！當然手塚筆下嘅小次郎就冇𠵱家電視版嘅松岡昌宏咁有型啦。
而地位同手塚有番咁上下嘅日本漫畫家石之森章太郎，七一年畫嘅《宮本武藏》一直被視為古裝漫畫不朽傑作，經典程度絕不遜於佢創作嘅《幪面超人》。至於曾畫過《巨人之星》嘅川崎昇，七四年就同《淚眼煞星》原作者小池一夫合作咗漫畫《Musashi》，入面嘅格劍場面非常暴力。不過，講到現時最受年輕人歡迎嘅武藏漫畫，始終都係井上雄彥畫嘅《浪客行》！