今年玩具界都有幾多喜事，人見人愛嘅小飛俠今年亦40周年，原來佢係4月7日生日。日本方面除會推出新一輯小飛俠動畫外，更會大肆鋪張，排山倒海地推出紀念版玩具及精品，價錢梗係乘勢而起啦！
香港原來有唔少癡心小飛俠迷，昂貴嘅懷舊玩具或普通精品，無一幸免均被收藏，好似超級Fans盧小姐，可謂其中一位表表者。新舊小飛俠玩具有乜吸引，大家睇完呢個報道，或多或少會有啲眉目。
記者：梁煒健 攝影：陳偉強
逢星期一至三刊出
現職文員嘅盧小姐，收集小飛俠產品已有七年之久，問佢幾時鍾意，原來喺佢中五嗰陣，因受傷時同學畀佢一塊小飛俠膠布，乍見小飛俠顏色靚、夠Sharp兼樣貌夠Cute，於是不知不覺地迷上小飛俠，亦開始墜入收藏玩具嘅深淵。
問盧小姐最有紀念價值嘅小飛俠產品係乜，她回答：「應該係早年男朋友送嘅一個小飛俠Puzzle掛牆鐘，雖然唔係好貴，但因為係我18歲生日嘅禮物，所以特別有意義。」盧小姐又稱：「就因為收到呢份禮物，即代表佢縱容我買小飛俠精品，於是我就愈買愈狂，但只會買玩具，見到乜都買餐飽，直到家陣不能自拔。」
原來喺兩年前，盧小姐好想買小飛俠出世倒數鬧鐘，行過好幾次旺角嘅玩具店都冇買，到最後賣晒先至呻笨。一年後，其上司適逢去日本旅行買到一個返嚟畀佢，失而復得嘅開心心情令盧小姐最難忘，亦教佢以後一見心愛產品即要買嘅習慣。
此鐘只於2000年7月26日至8月6日期間，於日本橋三越百貨舉行嘅「小飛俠ToyShow」中發售，家陣已成絕版貨，當時市價為$1,480。
由Billien出產嘅18吋高小飛俠大膠，着校服嘅小飛俠已難搵，而小蘭則難上加難。盧小姐年多前以$10,000購入呢對公仔，據講現時單係小蘭已值$12,000。
Popy廠生產咗一個名作小飛俠超合金，雙手可以發射飛拳，雙腳亦可以發射，而其心口內藏亦有小飛俠戲中人物，從後可轉動。雖然有盒賣$4,500，而冇盒亦售$1,680，盧小姐一早就預訂咗。
「我本身喜歡儲小飛俠產品，尤其係懷舊玩具，因為升值潛力較高，其中以60年代初期嘅小飛俠就最難搵兼升值能力最高。即使客人想買，都未必幫佢哋喺日本搵到，真係要慢慢等兼要好嘅價錢。」Andy直言。93年由「Billien」生產嘅一大一細小飛俠產品，大嘅高12吋，細嘅約有6吋，兩者均以彈簧頭作為賣點。
除小飛俠嘅玩具較為有保值外，較有實用價值嘅手表不妨選購。圖中嘅小飛俠手表出現咗最經典嘅甫士，右握拳左伸掌，男女都啱戴。
以長形鋁罐盛載着嘅小飛俠女裝手表，表面甚有強烈嘅立體效果；除咗有手表外，另附有保證卡、心口針等，相信不少女Fans會喜歡。
特別為小飛俠生日而推出嘅40周年紀念Boxset，其中有7種復刻產品，包括最多人想要嘅搪膠錢罌、黑膠唱片、10張彩色漫畫原稿及9本連環圖書等稀有珍貴。由於早已截咗定，未訂嘅朋友就要注意尚有少量於3月25日推出！
Boxset約$1,000
（超人玩具）
由明治菓子推出嘅鐵皮小玩具，除咗有糖食之外，另有16種不同形態嘅小飛俠造型附送，其中就有小飛俠坐汽車及電單車等小鐵皮，估計約在3月下旬推出。
由海洋堂出品、香川鴉彥負責造型嘅小飛俠菓子玩具，每款均做得表情豐富、栩栩如生，全套暫定有6種，每款約$25，於6月中旬推出，係Fans就要注意喇！
每個約$25
（超人玩具）
玩具之森
地址：旺角西洋菜街1N號兆萬中心地庫B1層B103號舖
電話：27823282
超人玩具
地址：旺角西洋菜街1N兆萬中心2樓222舖
電話：23662688
JCShop
地址：銅鑼灣勿地臣街1號時代廣場8樓833號舖
電話：31022783