「靚女！修甲修甲！10蚊修甲！」「10蚊修眉！10蚊修眉！」第一次踏入東門的九龍城商場，已經被一班各大修眉修甲店的推銷員圍攏起來，幾經艱苦，我才能突圍而出。原來這個商場已成為美容扮靚的集中地，好多本地人或港人都專程來這裏扮靚去Party，既然咁多人到此朝聖，就等我考考她們，看看她們的技巧是否真的咁到家。
記者：歐嘉荃 攝影：小王子
ImageGirl：Norris（Jamcast）、Cathy
九龍城商場樓高五層，除了地下及頂樓外，其餘三層均為修甲、化妝、攝影的店舖，入到商場可以令你即刻大變身。以下介紹這間扮靚店，絕對是其中的表表者，當中尤以Set頭最受歡迎，可依據你的喜好而設計髮型及化妝，就算拿着明星相照辦煮碗亦可。至於收費，每次Set頭?30，加顏色或者金粉的話各加?10，而化妝則收?30，價錢都算抵。
今年流行鬈髮，所以一於叫佢哋為Model炮製日本潮流先驅步姐的最新鬈髮。呢個髮型極具層次感，大圈中夾集着超細的鬈髮，要分布得靚的確幾考功夫，美容師阿英睇完張相，就依據自己的觀感，加了些紫色假髮，令效果更突出。
相似度：講真，同步姐的髮型比較就唔係好似，不過美容師為Model加了些顏色假髮作襯托，效果不錯，所以畀80分。
Step1捲鬈頭髮
ModelNorris的頭髮早陣子加了些駁髮，所以處理時要特別小心，美容師首先將頭髮用捲髮器把頭髮捲鬈，由於駁髮不可以受到太強烈的熱力，所以速度較慢。
Step2紫色假髮突出效果
美容師阿英覺得Norris的頭髮較為單調，所以加了些紫色的鬈曲假髮，效果不俗。最後幫Norris加番對SmokyEye就大功告成，需時大約1個鐘。
想效果更突出的話，不妨來個大膽的嘗試。呢個中等長度的鬈髮，髮型看似簡單，但要恤得唔土氣，確實有一定的難度。
相似度：除了頭髮的顏色有分別外，我覺得全個髮型的像真度都極高，有九成相似，少女得嚟又帶點復古的味道。最搞笑係整完後，圍觀的人都問Cathy個頭係咪假髮。
Step1鬈得要誇
Cathy一向都充滿少女味，呢個咁YoungLook的鬈髮就最合適不過。美容師小凡同樣用捲髮器將Cathy的頭髮捲曲，由於Cathy的曲髮要有誇張的效果，所以其鬈曲的感覺要較為強烈。
Step2將頭髮摷鬆
將全個頭捲好後，小凡便將Cathy的鬈髮弄鬆，令效果無咁死板。由於髮型充滿少女味，所以小凡便用草綠色的EyeShadow增添Cathy青春活力的感覺。
流行頭飾推介
除了Set頭化妝受歡迎外，這些頭飾都相當搶手。好似呢幾個小頭飾，全部都由南韓入口，是老闆娘精心挑選的貨品，「今年流行少女味重的髮夾，這幾個髮夾細細個，形狀又多，閃得嚟唔誇張，無論夾在直髮還是鬈髮上都好看。」
想成熟一點，大可選擇這個玫瑰花形的髮夾，我覺得此髮夾夾在鬈髮上，效果更為突出。
「今年流行在頭髮上駁冷，不過駁晒全個頭要八千幾蚊，若想迎合這潮流，不妨將冷混入辮子裏。」好似這些又粗又幼的波波冷，顏色選擇夠多又夠Sharp。
貪靚歌女變老闆
老闆娘簫惠認為女人是貪靚的動物，做女人生意最易搵錢，所以便開了這間髮型化妝專門店。開業已有4年多，老闆娘自己本身未受過化妝、髮型的專業訓練，店舖的口碑全靠一班專業的美容師。「我請的人都是一流的師傅，更會以高薪留住佢哋。」
為事業放棄唱歌
簫惠18歲已在四川、汕頭的夜總會唱歌，自從開了這店後，便放棄了唱歌事業，有時癮起，會唱吓卡拉OK止癮。
▲完美造型
▲地址：深圳東門九龍城3樓259號舖
▲電話：(86)75526246723
場內的另一間店舖則以修甲聞名，這裏開業已接近5年，老闆娘李小姐本身做開美容事業，所以顧客多是熟客仔，港客與本地客各佔一半。除了做修甲生意外還招收學生，徒子徒孫多到數唔晒，絕對係桃李滿門。至於收費方面，修甲及畫甲花各收?10，的確幾抵。
第一個要考的甲花便是畫花紋，老闆娘話畫花紋係講求師傅的手勢和藝術感。
老闆娘話香港人好鍾意喺指甲上黐閃石，所以一於示範日本步姐的經典閃石甲。黐閃石其實好簡單，不過本錢較多，每粒閃石就要?2，若加鎖匙扣的話就要?15一粒，的確揦脷。
最簡單的工具是牙籤、膠水同閃石，只要將閃石貼在指甲上便可。至於鎖匙扣則需用小鑽將指甲鑽一個小洞，然後扣上便可，不過我就嫌加了鎖匙扣的指甲較為「累贅」，感覺唔太舒服。
▲潮流特區扮靚靚店
▲地址：深圳東門九龍城4樓356A-355A
▲電話：(86)13682493416
店內經常有大班學生上堂，當師傅分別幫Model畫甲花時，全班學生都圍着兩位師傅，看着怎樣畫花紋，重有唔少學生拿出紙筆抄筆記，旁觀的我覺得都幾搞笑。
柏小姐是現場最勤力的學生，她不斷寫Notes，問她為何這般好學，她答：「我對畫指甲花好有興趣，畫指甲花看似簡單，做起來卻好難，見師傅畫花，就睇吓有冇嘢學。」
本地人趙小姐
「我每個星期都會來這裏Set頭，今次就嚟修甲，覺得呢度唔錯，收費都OK，唔係我都唔會喺度幫襯咗2年咁耐。」