佘詩曼之前違例駕駛扣滿分遭票控及發出拘捕令，直至前日阿佘現身法庭，被罰停牌三個月，事件才告一段落。不過佢心情冇受事件影響，噚日佢由保母車接載到將軍澳電視城，之後阿佘同張智霖、趙雅芝等出席電視劇《西關大少》嘅造型記者會。
阿佘出席完記者會就急不及待離開，同保母去又一城采碟軒歎茶，然後自己去逛超級巿場，買咗乳酪、椰青、海膽刺身等，佢重去到九龍城買VCD，直至下晝四點先返屋企，實行返屋企歎世界，阿佘話：「今日唔打算再出去，會喺屋企睇VCD食嘢同休息。」
另外，噚日喺記者會上見到趙雅芝嘅身形依然咁弗，旁邊嘅劉松仁口花花咁話：「係咩？摸吓先，真係同當年差唔多。」趙雅芝即刻話：「真係俾佢嚇襯，佢以前唔係咁㗎，成日都唔出聲，所以我哋當年唔會有緋聞，但𠵱家佢就風騷咗好多。」
組合Boy'Z噚日喺港台接受訪問，佢哋話自從喺泰國返嚟，因水土不服而減磅，Steven話：「我瘦咗十五磅。𠵱家我哋要好有技巧增肥。」稍後Boy'Z同Twins嘅阿Sa拍戲，Boy'Z話唔擔心同阿Sa傳緋聞，重講笑話：「唔驚！咁咪我哋兩個爭佢一個囉！」另外，早前Boy'Z接受訪問時，承認公司畀十萬蚊利是佢哋，而且房屋津貼重畀多一萬五千蚊，佢哋話：「係呀！兩個人夾埋萬五蚊，我哋諗住搬出嚟住，方便公司照顧我哋。」
蕭亞軒（Elva）早前接受新城電話訪問，佢話呢排主要忙緊下個月喺台灣開演唱會嘅籌備工作，因為今次個唱係喺黃昏舉行，所以Elva期待演出嘅氣氛將會好浪漫。而Elva又得到好多贊助商支持，日前就有贊助商送上護膚品同手提電話，唱片公司又送咗條三十萬新台幣（約六萬八千港元）嘅鑽石頸鏈畀佢，上面有Elva嘅簡寫EL兩個英文字，再鑲咗五十粒南非碎鑽，戴上頸度真係好閃㗎！
何潤東原來除咗識唱歌之外，重識幫師妹陳怡蓉當媒人。因為何潤東知道陳怡蓉同陳司翰合作拍劇之後，陳怡蓉對陳司翰有好感，重讚陳司翰風度翩翩，咁做師兄嘅何潤東就梗係幫口，猛咁話陳司翰確實係個好人選啦！不過就搞到陳怡蓉面紅耳赤。
馬來西亞歌手阿牛日前同八両金一齊幫有線娛樂台播映嘅台灣卡通片《阿貴》配音，阿牛為主角阿貴配音，而八両金就做嫲嫲。阿牛同八両金啲廣東話都唔好，配音一定好搞笑，不過睇嚟阿牛就緊張過八両金好多，佢話：「我第一次配音，廣東話又唔好，我諗過加啲福建話入去，會幾好玩。配音真係難過唱歌，惟有惡補啦！」
