雖然最低經紀佣金就嚟撤銷，成班經紀都愁緊點樣搵多啲錢，但由於唔少二三線股炒作，所以有個別經紀生意仍然好旺，當然唔排除佢哋亦落場炒埋一份，總之市場熱鬧啲，大家都開心。
經紀陳話，近排無論係客仔或者自己，都搵到餐晏仔。小初問佢有乜好介紹，佢話德發集團（928）有力再上。德發主力生產泳衣，但近期表明打算進軍休閒服市場。
德發近兩個月以來，一直在0.56元至0.61元之間窄幅上落，但上周突然發力抽上，衝上0.66元，呢兩日稍為回吐，形態上以旗形整固，噚日收0.62元，跌咗3%。
經紀陳話，據佢了解，除咗裕元集團（551）坐咗5%德發外，原來亦有個無寶不落嘅芬佬揸咗唔少貨。基於貨疏同埋揸fit人肯落本錢炒作，所以分分鐘有力再衝刺。
此外，聽聞公司稍後約咗傳媒去柬埔寨睇廠，到時又會有新聞出籠，可以借勢炒作一番，股價將再上層樓。
慕容小初