特區政府為財赤造勢，我哋一介小民聽完權威人士啲利率震盪論，好容易嚇親。一年七百億元赤字，點削減呀？據報道嘅所謂「三三方案」，公僕一年只係減薪五十二億幾，搵窮人開刀，減百分之十一嘅綜援，又係得二三十億，即使松哥左一刀，右一刀，都只係慳到百零億，唔怪得一定要開源，打埋菲傭印傭泰傭主意，加稅在所難免，我哋儲定錢可也。
一位老友記話：「既然慳得就慳，那麼嗰條所謂飛龍大光管，不如熄燈，慳電費啦！」又係噃，嗰條飛龍或稱餓狗大光管，全不美觀，晚晚要納稅人付鈔，既肉酸礙眼，又冇作用，點解晚晚要燒銀紙（交電費）？
不過呢啲事都唔夠大編輯嘅經歷咁礙眼。大編輯上星期有一晚凌晨十二時約咗記者到怡東酒店一樓咖啡室茶聚，記者坐低冇耐，發覺唔見咗荷包，都唔記得遺失在何方或者是否在銅鑼灣俾人打荷包，於是打九九九報警，落酒店大堂等警察入嚟落案。好快就有兩個警察行入嚟，點知酒店保安人員走出阻止，話酒店規矩唔畀着制服人士進內，跟住要大編輯及記者離開酒店，於是佢哋在街外寒風中報案，警察啲禮貌好到不得了，話驚俾人投訴喎！大編輯為之氣頂，認為酒店冇理由唔畀警察入內落口供嘅啫，保安員威風過警察，點搞？如果有人客在酒店內出事嘅話，酒店畀唔畀警察入內視察現場先？如果怡東有此政策，以後唔敢入去幫襯咯！