美股有無形之手嘅講法其實唔係空穴來風，好多時都有迹可尋，上星期五杜指、納指及SP500指數都係升1.3%，好似有人落「柯打」，升夠1.3%就收手。
趙飛雲前日膽粗粗，話美股反彈港股未必跟，好彩冇跌到眼鏡，恒指噚日初段升至9313，明顯受制於10及20日線阻力，最後倒跌11點，收9239，似乎周四期指結算，淡友可佔優勢。
倉內恒指Put輪9556平收0.128元。趙飛雲買9556主要係炒短線，短期恒指若跌近上次底部9072不破會先行獲利；防守策略方面仍係恒指升穿9300先沽一半，餘下一半以9460作止蝕位，升不破補回先前沽出一半。2月將完，3月將至，玩恒指Put輪要加倍留意數據變化，95563月28日屆滿，所剩時日無多，轉月份會順勢收埋溢價，到3月初可能不足1%。現時恒指Put輪數據以9587最佳，5月5日到期，溢價2%，槓桿率12.28倍，以引伸波幅計，亦係佢最平，乃換馬首選，先前提過嘅9619近日變得較貴，暫時玩唔過。
此外，玩Put輪亦要昅實滙豐（005）走勢，噚日港股靠佢支撐，升0.25元，收84元。
滙豐下周一公布業績，市場似乎睇得幾樂觀，雖然市場亦預計首季完成收購HI後，滙豐會有沽壓，但揸咗Put輪仍須提防滙豐在公布業績前後會抽高，所以之前提出滙豐確認升破84.50元，恒指Put輪要計數。
趙飛雲