繼自稱「青樓名妓」後，電訊盈科副主席Linus張永霖噚日又自嘲係「第二小提琴手」，比喻佢現時喺電盈所扮演嘅副手角色；但佢強調一啲都「唔計較」。問佢會否唔撈，答案係「主隨客便、客隨主便。」
話說Linus噚日出席母校香港大學進修學院「逆境創新峰」講座，八方於是去聽吓佢老哥嘅高論，點知，佢劈頭就話自己「正身處逆境」，因為以前係香港電訊「一哥」，一個人話晒事，現時只係「第二小提琴手」。八方好想知道，喺佢心目中，小小超李澤楷喺電盈呢個「樂團」扮演乜嘢角色？
Linus話：「除健康及平安外，其他一切都係小事，只要公司仍能為香港市民服務，個人並不重要。」佢自爆喺英資嘅國泰航空服務二十三年，當年眼見同期入職嘅牛津劍橋英國畢業生人工比佢高三倍、升職比佢快三倍，佢亦唔計較。「試過有次做嘢太搏命，得罪個高級外籍同事。有日，枱上嘅文件突然唔見晒，跟住佢同我講，你張枱再唔整齊啲，就掉晒你啲嘢！我冇出聲，將文件靜靜攞番再繼續做嘢。」今時今日至講呢個故事，都好忍得。
「𠵱家五十歲人，唔會只係為生活，重希望為香港社會做多啲事，希望香港爭氣啲、市民質素提升啲。」佢話睇見董特首就心痛，六十幾歲人做到頭髮白，重成日俾人鬧。
佢話都有從政意念，不過會得失立法會議員、公務員同埋有錢人。但其後又話如果從政，佢會建議改革香港教育，包括恢復體罰、恢復小學會考或初中會考、以精英制培訓香港人才與世界競爭；更要香港男生畢業前必須接受六周軍訓，培養佢哋嘅膽識、團隊精神。
Linus又話最唔鍾意新年恭喜人發財，賺快錢心態嘅人最冇素質。自己慶幸老竇冇錢，細個時要凌晨三點起身派報紙，「人生難得少年窮」喎！
傳真︰2623-9278
電郵︰