港股噚日在9231至9313窄幅上落，成交不足40億元，似死水一潭。
上周宣布為Reach撇帳83億元的電盈（008）被一眾大戶唱淡，股價一度挫逾5%，低見5.25元，收報5.35元，跌3.6%。港股噚日交投咁靜，但電盈成交有1.38億元咁多，可見芬佬沽得相當重手。有線寬頻（1097）股價亦進一步下挫至2.075元，再跌5.7%，相信2元關口都幾難守穩。
人人控股（059）停牌，原來是供股計劃捲土重來。公司去年8月曾宣布25股合1股，併股後再每20股供35股，每股供0.14元，但股東會只通過併股，唔通過供股，公司其後惟有配股集資861萬元。主席麥志揚曾於去年12月20日表示，配股集資後暫無集資需要。今次供股計劃捲土重來，反映在麥主席眼中，兩個月原來已經係好長時間，唔知今次供股又會否遇到股東反對而告終？
Cookie話，據講上次供股計劃告吹，其實係有人想借供股藉口壓價收集，今次則因為公司真係等錢用，加上現時股價已經夠低，所以供得成股機會頗大。
信用卡防盜（1051）噚日突然勁升54.5%，收報0.034元。市場初時傳話有猛人入股，不過公司話冇料到，不明升因。黑客話，由於股價近期過份沉寂，所以有炒家入市維持秩序，將股價Mark高，冇其他特別原因。
國內道路網及路費政策經常改變，據聞深高速（548）旗下兩條國道可能因收費站遷移而被迫出售，有消息話售價可能高達10億元人民幣。深高速成間公司市值都只得12.6億元，如果消息係真，可以刺激股價造好。
阿虎