我大口羅拉雖然重未嫁，但亦都明白一個女人結咗婚，梗係有啲改變。好似二十歲嘅宇多田光咁，自從做咗少奶奶之後，呢排打扮都冇咁小妹妹，佢喺新歌《COLORS》嘅MV入面表現出嘅嗰一種成熟同sexy，更加令我羅拉睇到眼定定！
光妹為咗令人有耳目一新嘅感覺，今次MV冇搵佢個攝影師老公紀里谷和明幫手，特登第一次搵外國導演操刀，出嚟嘅效果又真係拍到光妹好鬼靚，起碼唔似佢呢排上電視節目時咁師奶仔。光妹喺MV入面着咗一條黑紗吊帶裙，高貴得嚟又飄逸，都幾性感誘惑。
除咗玩黑色誘惑之外，光妹又着咗一條橙紅色嘅長裙，配埋對白色高踭鞋，鬼咁有女人味。而光妹今次除咗用一班光頭猛男赤膊做人肉布景板之外，個MV入面亦出現咗兩個性感女子，佢哋攬埋一嚿做啲高難度嘅奇怪動作，我羅拉驟眼望埋去，重以為冇紮辮嗰個係光妹㖭！