排骨玉女俾歌星男友飛咗之後，佢喺公眾嘅表現係有啲失常，雖然佢成日想𠝹仔，但呢個圈啲男仔其實幾怕佢，好似初時佢同人講有個靚仔圈中男友，但嗰位靚仔根本唔係同佢拍拖，但後來俾狗仔隊影晒相，個靚仔都有同朋友呻，話佢咁高調，想有圈中男仔追佢都難。
排骨玉女啲失控表現有時亦會影響到工作，所以同佢合作過嘅導演都唔多想再合作，最近有間電影公司要開戲，但啲導演就唔肯用排骨玉女。早排排骨玉女見冇乜戲拍，佢上電影公司同老闆喊晒博同情話要拍戲，不過嗰間電影公司個老闆都好錫佢，結果個老闆真係盡量說服啲導演用排骨玉女，不過如果佢重唔識自愛，老闆點錫佢都冇用啦！
保采芬同左慧琪噚日喺尖沙嘴出席活動，左慧琪嘅一身造型有麥當娜嘅影子，佢話：「我好鍾意麥當娜，但唔係刻意抄佢，靚先跟啫。」保采芬手上戴咗好多條水晶鏈，佢話係媽咪買畀佢嘅。問佢有冇覺得運氣好咗？佢話：「一般啦，唔係話要乜就有乜，我好想拍劇，雖然我知好辛苦，但都想試。」
蕭亞軒（Elva）將會喺下個月二十九號喺台北舉行演唱會，所以佢呢排特別落力宣傳，日前重着住套自己設計嘅春裝出席記者會。雖然佢套衫都幾靚，但對五吋高踭鞋真係好高，Elva着住都心驚膽跳怕跌倒。Elva話佢演唱會一開賣，有間公司嘅老闆就掃咗一千五百張飛畀員工睇，而今次贊助Elva演唱會嘅廣告商，之前係搵開孫燕姿拍廣告，Elva話孫燕姿亦係佢好喜歡嘅歌手，希望佢會嚟睇自己開騷喎！
吳國敬同徒弟吳展濠噚日喺紅磡出席活動，佢話之前同Cookies嘅Helena合拍MV，嚟緊四月亦會為無綫拍劇，佢重話已經有心理準備拍劇集時會日夜顛倒。而吳展濠今次拍劇亦會再同Cookies合作，佢話唔擔心會同佢哋傳緋聞。
毛阿敏主唱、內地電視劇《處決令下達以後》嘅主題曲《風中的小提琴》，最近俾成都女子陳曦，聲稱兩年前花咗八萬蚊人民幣，向作曲家蕭白買咗呢首歌嘅版權，所以佢將會起訴侵權者。陳曦○○年參加一個歌唱大賽，大賽規定參賽者必須唱原創歌曲，所以佢就買咗首歌嘅版權，而陳曦亦憑呢首歌攞金獎。內地記者聯絡上作曲人蕭白，但蕭白唔肯回應，不過就話會同陳曦聯絡。
葉童噚日同劇集《撲水冤家》一班演員到新城接受訪問，葉童話好希望《撲》劇可以有三十八點收視。而葉童最近亦憑《五月八月》一片提名香港電影金像獎最佳女配角，佢對於自己入圍好意外，但佢就睇好對手章子怡奪獎，因為佢覺得章子怡喺《英雄》表現好好。
歐陽菲菲日前喺台北國父紀念館舉行兩場演唱會，今次係佢事隔二十三年後再喺呢個場地演出，所以佢特別緊張，表演服飾花咗幾百萬新台幣，其中一條短裙更值三十萬新台幣（約六萬八千港元）。而今次嘅表演好成功，歐陽菲菲嘅日裔老公式場壯吉事後重陪佢去慶功。
