港股唔跟美股升，兩件電訊股電盈（008）同聯通（762）繼續有壓力，分別下挫3.6%同1.9%。
電盈不利新聞多多，個勢唔妥，咪貪平買電盈Call輪，可以諗吓Put輪9652，但隻輪槓桿率得2.2倍，即係話要正股散9%，揸隻輪先至可以賺20%，唔夠爆炸力。
聯通收5.10元，5元邊邊有支持，呢個位可以博反彈，不過啲Call輪隻隻都好價外，就算估中正股方向，都未必有錢賺。
有電訊股質地嘅和黃（013），昨日再跌60仙，不過唔係件件Put輪都有得升，隻9568就係，原地企喺2.9仙。
9568今年4月11日到期，溢價14.1%，槓桿率163倍。14.1%代表到期之時正股要跌14.1%，隻輪先至可以值得現時價值；睇另一個數字，行使價41元，正股𠵱家47元，要跌到落41元以下，隻輪先至值錢。正股跌到41元，機會好微，所以太價外嘅窩輪，唔跟正股變動一啲都唔出奇。過多4日，又到3月，每逢轉月份，高溢價嘅窩輪，都先捱一棍，留意避開呢類窩輪。
中石油（857）升1仙，Call輪9361可以揸些少。油價上周五再升，油股有機會造好些少，9361數據唔錯，現價12.5仙，可博1成利潤。
章盛