近期都唔知點解咁多大陸錢流入本地股市，有大陸盤做嘅經紀，話題總係離唔開邊個大陸客圍咗邊隻新股嚟炒，又或者邊個大陸客抬錢落嚟準備炒起某一隻股。
其實小初有啲唔明，現時唔會有太多散戶跟炒股仔，就算炒高都未必散到貨，但仍然有人樂此不疲，唔通真係錢多得滯，唔怕縛住？
上個月中先至由創業板轉往主板掛牌嘅華翔微電子（1195），呢兩日成交突然急增，股價異動。據講又係有大陸錢殺到。華翔噚日升8.3%，收1.17元，成交股數有640萬股，金額732萬元。
經紀陳話，華翔在創業板之時，已受到炒家歡迎，舊年曾經成功批過兩次股集資。
不過，8字頭嘅創業板股份多數係私人派對，就算真係炒高，但散唔散到貨，其實大家心中有數。
家陣變咗主板股，就自然唔同講法，加上隻股就夠期公布中期業績，所以炒家埋位準備亦十分合理。
慕容小初