近年腦場興起一股骰仔電腦熱潮（CubePC），受歡迎主要原因當然係夠晒慳位，香港地寸金尺土，傳統機箱加個CRT大芒真係好阻地方，而CubePC配個LCD嘅慳位程度可媲美Notebook，價錢同升級方便度重有過之而無不及㖭。
記者、攝影：徐影龍
ImageGirl：Suki
現時腦場提供嘅CubePC，大多以Barebone（齊料機箱）為主，其他主要硬件如處理器、記憶體及硬碟等均需另購，好處係靈活性較大，用家可因應唔同需要而決定機能，用家大可「睇餸食飯」，配套啱心水嘅靚機。
CubePC流行主因係其機箱體積設計夠慳位，比傳統大牛龜機箱足足細一半有多，對於書房或小型辦公室等工作環境尤其適合，加上外殼設計愈出愈靚，放係枱面當Display都得。由於CubePC架構跟黃金嘜砌機同出一轍，故此升級自由度亦相當高，隨時更換處理器、加RAM或硬碟都好方便，變相延長電腦壽命，若非對機能有太高要求的話，CubePC絕對係抵玩兼慳位之選。
SHUTTLE為台灣品牌，主力推出主機板，今次以CubePC作另一重點發展方針，除憑強項產品主機板控制質素及成本外，亦花咗唔少心思喺外殼設計上。首先SN41G2型號嘅銀色全金屬外殼畀人一種Cyber得嚟又簡潔嘅感覺，機前面板之光碟機及磁碟機位置均有同色面蓋，就算唔裝CD-ROM或磁碟機都可令整體感覺更統一，當然亦可配襯同廠另購之四色機箱外殼（價錢未定），幫部電腦換新裝。較特別係SN41G2配備GeforceMX顯示晶片，可共享128MB主記憶體，卡背設有S-Video插頭，可直駁電視睇碟。
估唔到音效界龍頭Creative連CubePC都有興趣，多年前推出嘅BlasterPC用盡一切頂級硬件，可惜因賣價太高而遭市場淘汰。新推出之「SLiX」則走較大眾化路線，同屬齊料機箱產品，不過採用全鋁製框架及機殼，而且強調低噪音及高效能散熱能力。處理器支援478針之Celeron1.7至2.2GHz及P41.4至最新嘅3.06GHz，較一般CubePC更優勝之處，在於同時設有光纖In及Out、USB2.0及FireWire高速介面（SB1394已取消），當然唔少得旗下王牌音效卡，兩款型號分別跟唔同嘅音效晶片，包括SBAudigy2或SBLive!5.1，打機聽歌效果肯定勝人一籌。
同廠尚有另一款SK41G型號嘅CubePC，走較低檔平價路線，底板晶片組為VIA8235，只支援SocketA266/200MHzMSB，可選擇安裝處理器種類唔算多。而整合式顯示晶片只採用VIASavage8，表現只算一般，不過奇怪廠方竟安排有SPDIF插頭，作為接駁擴音機播放5.1環迴聲道輸出之用，只需配部DVDROM便可欣賞DVD影碟。
雖然機能上不及SN41G2，不過對於應付上網收發電郵或文書工作已足夠有餘，加上賣價更平，適合以工作為主嘅用家或辦公室之用。
查詢
南中國科技
電話：25906808
Creative(HK)
電話：23312930