響今屆日內瓦車展上，一眾由各大車廠設計師精心設計嘅概念車，將會成為車展會場上備受注目嘅車款之一，其中尤以標緻Hoggar至為突出，𠵱家不如一齊嚟先睹為快啦！
響會場上，相信會以法國標緻嘅Hoggar至為吸引，因為佢擁有酷似貓眼嘅頭燈設計之餘，加上予人有粗獷感嘅車身線條，望落好似一隻獅子咁兇猛，好有一份懾人魅力；車廂內部亦以真皮同金屬作配搭，真係好有CyberFeel㗎！車內座椅用上超輕鋁合金作材料，以一體成形之餘重用上高級真皮包裝，乘坐貼服舒適；中控台頂端更設有輕觸式屏幕，可充當導航系統、選擇收聽以MP3形式儲存於車內電腦嘅樂曲，又或者係檢視引擎運作情況都得㗎！然而，車子就以兩台設於前輪及後輪嘅HDi柴油Turbo偈作動力核心，引擎容積合共為2168cc，而總馬力輸出更高達360匹㖭！
顯現活力感
來自日本嘅萬事得車廠亦不甘示弱，同場亦會展出一款名為MXSportif嘅概念車；此車以一台2.0公升MZR引擎作核心，動力輸出充裕之餘，匹配一套5前速CloseRatio手動波箱，性能表現倍見突出。MXSportif造型亦流露有一份年輕活力感，其中略帶有同廠RX-8車系影子嘅車首造型，附以一套闊大五幅式跑車合金胎軨組合，就最能夠將呢個特點展露出來；加上採用掀背式尾門配搭，提存儲於尾廂嘅行李亦來得更方便呢！車內座椅布局亦見靈活多變，加上富有動感嘅車廂布局，相信定能吸引到唔少年輕車迷注視㗎！