每次過關，都見太太們一袋二袋咁搬啲戰利品返香港，有時都會諗深圳啲嘢係咪真係平到咁。認識了兩位差不多長駐深圳的香港太太，一問佢哋深圳有乜抵買家品，佢哋即刻滔滔不絕咁交流心得，我就一於跟佢哋去Shopping，睇睇佢哋推介邊啲精選貨品畀大家。
記者：歐嘉荃 攝影：陳良、小王子
實用精選
呢個保溫瓶，全個用不銹鋼製成，保溫度高，可保溫3至4小時，放熱辣辣的飲品或者湯就最適合不過。而我最欣賞便是其輕巧的瓶身，再配上方便攜帶的黑色仿皮袋，的確夠晒方便，這瓶容量約有350cc。
售價：?31.7（萬佳）
雖然垃圾桶體積較大，但論外形同價錢，亦屬於非掃不可的貨品之一，好似呢兩個企鵝垃圾桶，外形就夠晒Kawaii，企鵝的雙腳更是垃圾桶蓋開閂的腳踏掣，設計夠晒心思，放喺廚房的確係唔錯嘅點綴。備有藍、黃、綠三色，尺寸則有13吋及10吋兩款選擇。
售價：?32.8（左）/?23.8（右）（吉之島）
顧客直擊
「我都知好多香港人成日嚟深圳買嘢，我會推介去萬佳，而我最鍾意就係買啲小家品，好似保溫瓶、層架咁，實用外價錢又合理。」
睇睇吓廚具，GiGi就一支箭咁標開咗，原來佢睇中喺附近嘅拖鞋，「呢對拖鞋，鞋墊位以蓆製成，夏天着住特別涼快，而且鞋底又夠硬，鞋面嘅布就夠晒軟熟，着上腳特別舒服！喺香港，以咁嘅質素，起碼要多一倍價錢先買得到。」
售價：?19.8（吉之島）
街坊推介幾蚊貨
嚴太話近排囡囡想要個微波爐盒，作為二十四孝媽咪嘅嚴太，當然唔會托囡囡手踭，嚴太就揀咗呢個微波爐盒。「囡囡好鍾意兔仔同熊仔圖案，呢個飯盒就啱晒佢，最衰入面無間隔，擺餸唔係咁方便！」不過?7.9嘅飯盒居然重送埋匙羹，的確夠晒體貼。
售價：?7.9（萬佳）
聽嚴太講深圳嘅洗衣袋特別好用，原來係同條拉鏈有關。「呢度啲洗衣袋條拉鏈特別短身，而且袋的車法都有唔同，放入洗衣機洗完後無咁易「Wear」，襟用好多！」而我左睇右睇都唔覺得同香港所賣嘅洗衣袋有乜分別，不過呢啲咁細微嘅用家心得絕對寶貴。
售價：?5.5（吉之島）
顧客直擊
「我鍾意喺吉之島買家品，就算係?10以下嘅貨品質素都好好，而且款式夠多，好多時我都會專登嚟睇吓有無新貨，不過就唔係次次都買！」
勁抵三寶
論抵買，GiGi就首推呢個Meyer的平底鑊，「呢啲平底鑊喺香港閒閒哋都要近百蚊先有一隻，呢度幾十蚊就有交易，每次有朋友問我有乜嘢抵買，我都會叫佢哋「孭隻鑊」返香港，因為真係抵好多。」而呢隻平底鑊有成28cm闊，只賣?48，唔怪得咁多太太都唔介意「孭鑊」啦！
售價：?48（吉之島）
睇完GiGi嘅心水推介，就輪到嚴太嘅心水嘞！呢套七件套裝廚具就的確抵，全套有一個連蓋砂鍋同5隻碗，全部都係用陶瓷製成，朱紅的色調充滿日本風味，雖然屬於國產貨，但唔使?50，我見到呢個價錢都嚇咗一跳。
售價：?49.8（吉之島）
見兩位太太行得咁開心，跟喺後面嘅我都開始留意啲價錢，我就睇到呢套餐具夠晒抵，全套有10隻碗同10隻匙羹，一共20件，產自廣州，雖然白色較為單調，但勝在襟睇唔會過時，而且重可以放入微波爐，最啱經常請客嘅家庭使用。
售價：?48（吉之島）
售賣點
吉之島
地址：深圳福田區深南中路1095號中信城市廣場地下一層
電話：(86)75525942828
萬佳百貨
地址：深圳羅湖區春風路2021號長豐苑
電話：(86)75582367220