唔講唔知，原來經常為公司同香港大賣廣告嘅國泰航空，其「翹首展翅」標誌，竟然從未喺夜晚閃亮過，連過年或聖誕燈飾都未見過有。八方最近翻閱國泰嘅內部刊物《國泰天地》，有位國泰忠實擁躉就提出呢個縈繞心中多年嘅疑問。
國泰市務部當然不敢怠慢，即刻解畫，原來唔做戶外霓虹燈廣告嘅主因，唔係國泰孤寒，而係商標專用嘅綠色，唔知點解試過晒所有霓虹燈都無辦法準確出到，但又唔可以出一個冇招牌嘜頭嘅燈飾咁失威，所以國泰惟有放棄，改用海底隧道同東區走廊嘅大型廣告板。
而國泰嘅同行港龍航空就傳來好消息。話說上星期五，荷蘭阿姆斯特丹機場有個頒獎禮，其中二○○二年「洲際最高效率航空公司」榮譽，有三間公司獲提名，就係新加坡航空、極地航空同埋港龍，結果由港龍奪得呢個貨運業殊榮。
港龍當晚派咗駐阿姆斯特丹嘅歐洲區貨運營銷服務經理GerardTerbruggen去領獎，佢哋二千年先至開辦歐洲嘅全貨運服務，咁快就獲業內肯定，難怪公司貨運經理黎國倫都話好令人鼓舞。
傳真︰2623-9278
電郵︰