為提高警隊形象，警方舊年同香港電台合作，以真實案件改編拍成八集電視劇《執法群英》，逢星期五晚喺無綫翡翠台播出，據聞收視唔錯；八方聽聞一哥曾蔭培都有睇，重下令將劇集製成DVD，不過警方發言人話套DVD屬非賣品，只會送畀訪問警隊嘅貴賓，一般人有錢都買唔到。
劇集監製施潔玲透露，呢次係警方十幾年來，第一次同港台合作，唔單止安排參與案件警員同編劇見面，拍攝時重搵埋真警員上陣，佢話有次半夜去砵蘭街拍外景，警方封咗成條街，重有成隊衝鋒隊做「茄喱啡」㖭。
警方有求必應，係因為套劇有助改善形象，施潔玲強調無刻意美化差人，但相信有「軟銷」效果；而佢哋亦碰過釘，原來港台提出想拍梁成恩遇害嘅殺警案，不過警方話未查完，唔拍得。
有見警隊拍劇做公關呢條橋掂，其他紀律部隊亦想上鏡，不過政府水緊，開劇無期。
傳真︰2623-9278
電郵︰