來季本地賭波合法化，雖然足球博彩回報有限，但係想到時到候有馬會請你食飯睇戲嘅話，就要認住「蘋果波經」及「青蛙仔」兩個嘜頭喇！
「蘋果波經」今季堅料不停為你送上，並非間中貼中一次半次咁簡單，班名家嘅預測，重準過天文台！
今季以青蛙仔最猛料，成為多個榜榜首，就連波膽咁難估，都畀佢中完一次又一次，中親嘅重要係幾十倍嘅波膽喎！我求大俠最近都忍唔住走去問佢有乜心得，佢就好謙咁話，只係做好自己份內事啫。
話埋畀大家知，佢對德國波就最瞭如指掌，上周六、日喺國際擂台共四場德甲亞洲盤全中，當然重有凱沙羅頓贏二比○波膽啦，唔怪得喺國際擂台一枝獨秀啦！
阿仙奴喺星期三就會作客阿積士打歐冠盃，對於呢啲要作客到海外進行嘅賽事，通常都唔使預有飛行恐懼症嘅伯金可以上陣，而且上個禮拜阿仙奴主場對阿積士，伯金有上陣但表現都係一般。不過領隊雲格仍然要伯金隨行（當然係循陸路啦！）喎，唔通真係貪佢喺阿積士班荷蘭後起之秀面前，起到壓場作用？定係佢當返屋企咁，所以順便叫埋佢啫！
意大利球迷暴力問題愈來愈難控制，班友仔好似想以後冇波睇咁款。繼拖連奴對AC米蘭因為騷動而腰斬咗之後，周日意乙嘅安科納對維琴察賽事，又有球迷將個土製炸彈以及引爆器分別掟入球場，雖然個引爆器被工作人員及時發現，但係班球迷再咁搞落去，意大利足球真係搵你睇囉！
羅馬星期日晚輸埋畀烏甸尼斯之後，已經跌到落去第十位。咁即係話，周三歐冠盃對華倫西亞，羅馬輸埋出局嘅話，來季要踢歐洲賽就只有寄望意大利盃。最近佢哋就好似拉素一樣，話係個奧林比高主場草地情況惡劣累事，其實兩間會講咗呢個問題咁耐，點解唔好似車仔咁嗱嗱臨換草皮呢？唔好淨係賴地爛至得㗎！
受到唔少球迷質疑係咪可以成為英格蘭國家隊正選門將嘅占士，喺星期日晚對西布朗時，就幫效力球會韋斯咸救出唔少險球，表現值得一讚。不過我求大俠始終覺得，呢位門將嘅表現同當晚贏波嘅韋斯咸及伯明翰盤路表現一樣，間中會反底威吓，到一下一場可能又會現形，海鮮波唔咁值長捧。