食完碌柚的柚皮通常會被棄掉，但只要加點心思，柚皮也可變美食之餘，亦是三代母女感情的見證：由阿琼媽媽傳授的釀碌柚皮，家陣再由阿琼將之傳給女兒，可謂傳足三代。原來二十年前阿琼就是用這家傳秘技而覓得她的如意郎君，見證了一段美好姻緣，為了女兒將來也有如此姻緣，她就將這家傳秘技由阿女延續下去。
記者：陳冰麗 攝影：陳盛臣
逢星期一至五刊出
這是阿琼在鄉間由細食到大的一款家常菜式，阿琼記憶猶新道出當年都是靠呢味阿媽傳授的獨門菜式，至能覓得現在的如意郎君，黃生因為怕羞，始終也不願意拍照，不過他表示，現在老婆所煮的釀碌柚皮同二十多年前所煮的味道分別不大，只是餡料有所不同而已。
由母親傳到現在，阿琼的十二歲女兒阿欣嚷着要阿媽教授如此好味的一個菜式，企在旁的我當然要從中偷師，原來做法並非想像中難，食落卻更加意想不到，估不到被視為無用的柚皮，再經加工處理，可以變成另一美味菜式，非試過也難想像到，食落一點苦澀味也沒有，妙絕！
碌柚2個
鯪魚肉4両
脢頭豬肉碎6両
韭菜花（切碎）適量
龍即蝦，鳳即雞，阿琼話嫁得一位好老公，生活無憂之餘，同樣自己亦大飽口福，言下之意何解？
原來黃生不但是一位愛錫老婆的好老公，而且還是個廚藝了得的酒店大廚，呢味鴛鴦龍鳳配就是黃生反過來去俘虜老婆的心，原來阿琼至愛是蝦及雞，所以黃生就專誠設計了呢款餸名靚，賣相靚，食落更不能停口的鴛鴦龍鳳配畀老婆。阿琼話自從老公教曉自己煮後，幾乎每星期有三晚都會炮製呢味菜式，細仔亦食到舔舔脷。
海蝦8隻
雞胸肉4両
西蘭花1斤
蒜頭2-3粒
甘笋少許
薑、葱頭適量
鹽、糖、雞粉、胡椒粉各少許
筲箕灣街市是阿琼每日買餸必到的地方，這裏賣的，無論蔬果海鮮，都比他區為平。這日阿琼就帶我們到她經常幫襯的檔口去，發覺阿琼不但健談，還好懂得social，買五蚊鯪魚肉，有十蚊的份量，阿琼果然厲害，對於買餸初哥的我一於要貼身跟實她，跟她學吓嘢，預備買今晚要煮的餸菜啦！
碌柚即是沙田柚，阿琼買碌柚最鍾意到裕記，佢話該處的碌柚又多又平，足足比市面一般果檔平兩至三成有多。揀碌柚，阿琼話至緊要攞上手，夠重身即代表個柚唔係「生乾精」，果肉夠水份，其次要留意果皮要光滑而非起晒皺紋，最後要睇吓碌柚底部，有粒「的」即代表柚肉清甜又新鮮。
阿琼平日買海鮮，必幫襯協興，除了這裏種類多元化之外，還因為老闆夠老實，畀足秤，有時甚至會秤多份量畀佢亦在所不計。今日，阿琼到此只買$5鯪魚肉，檔主見她是熟客仔，即隨手舀多一小殼鯪魚肉落袋，但仍只收$5，阿琼所言非虛，檔主果然足秤，重大贈送益街坊。阿琼提醒大家，家陣大部份鯪魚肉已調好味，最好問清楚檔主，免返去重複調味令鯪魚肉鹹上加鹹。
西蘭花營養價值高，多食有預防高血壓作用，阿琼話老人家不妨多吃一點，所以每餐餸菜都幾乎有西蘭花。現時西蘭花也不難搵到，中國及美國均有入口，不過講到品質靚，當然以美國來路貨優勝，阿琼話有時間中喺街市都搵到中國入口嘅靚西蘭花，揀時至緊要留意花蕾夠結實就可以喇！