一代馬王「靚蝦王」噚日告別馬壇光榮退役，馬會同呢匹馬王搞咗個告別儀式，八方係「靚蝦王」擁躉，所以專登入場一睹馬王風采。
所謂長江後浪推前浪，一代新馬換舊馬，榮智健嘅「奧運精神」繼去年為港爭光贏出國際賽香港一哩錦標之後，噚日再捧走埋香港金盃，又執獎金四百五十萬，咁啱呢場金盃賽由榮太頒獎，由太太頒個金盃畀老公，都算美事咯。「奧運精神」呢隻可以媲美「靚蝦王」嘅良駒，至今經已累積獎金高達三千一百萬港元，你都咪話唔和味！
榮大董喺呢場大賽派「掌門」同「奧運精神」上陣，佢話賽前比較睇好「掌門」，可惜最後跑個梗頸四；反而「奧運精神」喺騎師冼毅力胯下後上擊敗大熱門「赤脉福星」，賽後榮大董開心之餘，重猛咁多謝練馬師愛倫。至於愛倫就話「奧運精神」賽前曾經發過燒，經馬會兩位獸醫睇過，認為可以出賽，否則便錯失贏馬機會；「奧運精神」下一個目標係遠征新加坡新航國際盃，跟住就返港備戰四月嘅女皇盃。
傳真︰2623-9278
電郵︰