近期有兩隻小型工業股招股上市，一隻叫做百靈達（2326），一隻叫做科浪國際（2336），兩間公司嘅股票編號真係似得緊要，重要一齊在3月3日掛牌，真係巧合。
靚女經紀同小初講，現時咁嘅市況都招股上市，又點會冇人睇場，兩股上市之後，必有一番熱鬧。
百靈達主業係生產小型家電，其中以電水煲為主。公司其實話搞上市已經講咗好耐，點知舊年12月，原來應承幫手嘅大戶突然臨陣退縮，搞到要押後招股。公司終於在早排成功搵到人幫手，不過要降低小小招股價，先至上到市。
今次負責百靈達係一班女將，據講今次百靈達係佢哋省招牌之作，所以配售反應好到不得了。至於科浪，靚女話負責幫手圍飛嘅幕後人，據講與永成化工（850）上市一班人有關，大家應該記得永成上市初段表現係威係勢，斷估科浪亦唔會差。
慕容小初