中環威靈頓街午市長龍店沾仔記，最近在同區干諾道中開設新店，一到午市又是全場爆滿。沾仔記老闆楊生由父親一代由車仔檔做至大角嘴、中環地舖，再轉埋快餐路線，這個老字號逆市開分店的罕見現象，原來皆因三碗十蚊麵。
記者：邵超 攝影：陳盛臣
逢星期一至五刊出
沾仔記可謂是雲吞麵世家，楊生爸爸楊沾開創車仔檔沾記，楊生繼後開店，改名沾仔記，傳到兒子家樂這一代，我開玩笑應該改名為沾孫記（沾孫與尖酸同音），楊生和家樂聽到笑得眼睛瞇成一條線，兩父子在這方面最相像。拍二人示範包雲吞，他跟家樂幾下手勢已包好一隻雲吞，拋落盤的姿勢重好型仔㖭，果然寶刀未老！
楊生三代經營雲吞麵店，一家人食雲吞多過食飯，加上不少親戚、徒弟學有所成，自立門戶開店，遠至加拿大也有沾仔記。楊生話上一代人希望徒弟可以有能力搵食，教授時唔會留一手，不過要求嚴格，連長女男朋友都無面畀，一樣有錯照鬧，學滿師才將淥麵重任交託給他。
「我三歲時老竇已經揹住我開檔。以前做仔年代無得揀，老竇叫你做乜都要做，從此三歲定八十。」雖然家樂兩姊弟讀書時間中也會落大角嘴舖幫手，不過楊生捱過苦，細細個時要看舖無得玩，反而唔希望家樂兩姊弟入行。家樂仔指老竇改名已經睇到佢嘅心意。「阿爺改老竇名叫子勤，希望佢勤勤力力，我老竇改我名做家樂，就希望一家人和樂。」楊太為楊生生下一對仔女，湊成一個好字，一家齊齊整整，當然闔家歡樂啦！
沾仔記的辣椒醬遠近馳名，上年陳慧琳去日本做宣傳，佢就係買咗佢最愛嘅沾仔記辣椒醬送畀當地嘅主持人，店裏不時有日本客手持日本雜誌的報道嚟搵食，所以牆上寫上日語餐牌亦唔出奇。不過沾仔記出名是事實，皆因每碗麵都用料正份量足。
中環舖由四百幾呎擴充至千呎，全盛時期有三個人專責包雲吞都包到手軟。𠵱家中環新舖重先進，電腦入票，櫃位落柯打廚房即知，顧客由買票至捧餐都是自助式，減省好多人手，沾仔記已進入新紀元。
「個仔讀工商管理咪畀佢試吓，下一代嘅責任係要去更新同進步……需要好大勇氣。」
沾仔記未來會繼續專攻三大天王，寧精勿濫保持質素，呢份堅持，就係沾仔記多年不倒的原因。楊生𠵱家過嘅係半退休生活，做背後監督，我笑他是名譽顧問好架勢，他又笑到瞇眼，完全是一副幸福相。
地址：中環干諾道中61號地下
電話：25813369
營業時間：8:00am-8:00pm