上周五晚美股彈升，港股經當日跌139點之後，可能會借美股冇跌到而有技術反彈，但恒指升幅若然超過100點，買Call輪冇乜着數，驚住期指結算前又俾人掟番落去。穩陣做法係等啲大藍籌再跌多啲至諗吓相關Call輪。
恒生（011）上周跑贏大市，5日加埋升幅1.50元，收83.75元，下周一派成績表，市場預咗唔會有乜驚喜（02年度上半年盈利微跌2.9%），但末期息如果有得加嘅話，會有少少刺激，正如東亞（023）派成績表後散落去，但因派息率提高，股價由低位回升些少。等機會，若然呢幾日恒生跟大隊回軟，不妨細細注執些少恒生Call輪9654，現價28.5仙，7月到期，溢價7.1%，槓桿率29.4倍，回落到26仙左右上車。
地產股上周五跌得多啲，新盤價格戰有影響，但唔適宜認為地產股會直落，到咁上下亦有反彈機會。新地（016）收45元，上次低位43.40元，估計唔破，挨近呢個價，執啲Call輪9593，5月到期，現價16.5仙，溢價8.1%，槓桿率27.3倍。留意溢價唔算低，且夠鐘之時新地已除中期息（上年每股0.55元），吼低買貨都只應短炒博技術性反彈，咪坐盤坐得太耐。
章 盛