最近有居於深圳的朋友報料，話華麗路開了一間新食肆，老闆是香港人，以港式火鍋小炒作賣點，雖說是港式口味，但當中有不少菜式都是大廚的創意之作，味道同款式都是獨家。好似燒BB豬、港式炸花卷、港式生牛肉刺身都是老闆用來打響名堂的菜式，聽到有好嘢食，我又點會放過？去到後發覺菜式多元化，而我就揀選了幾款必試之選，又睇睇有邊款啱你胃口！
記者：黃希知 攝影：陳星、林鑑琛
熱賣1
我一直以為BB豬亦即是平時經常食到的乳豬，經師傅解釋後先知原來兩者大有不同，「乳豬是指已長大到戒了奶階段的豬仔，而BB豬則是指真正剛剛出世不久，仍然處於食奶時期的豬BB，平均每隻只有四斤重左右，身形比乳豬還要細小。」BB豬有幾細隻？我們即時用軟尺度一度，由頭度到落腳，每隻都只得二十吋左右，比起乳豬果然細得多。BB豬另一個賣點是由人客落單到燒到上枱，整個過程只需十五分鐘，夠晒新鮮熱辣，BB豬經過秘製調味料醃過，燒香後的肉質嫩滑之餘，就連骨都變得脆卜卜，是真正的化皮燒豬！
成日聽人講化皮乳豬，但要怎樣燒製豬皮先夠化？我叫負責人帶我入廚房偷師，入到去只見天花板倒吊了幾隻BB豬，師傅解釋每次燒豬前都要將醃好的豬吊起風乾，將多餘的水份吹乾後再燒，燒出來的豬皮才香脆鬆化。
BB豬經師傅自製的秘製醬汁醃過後，當有客人落單時，就會即時用炭爐以明火慢慢燒，拍攝當日只見師傅蹲在地上，慢慢不停地轉動大叉，又不時在豬身塗上生油，他表示邊燒邊塗上生油可以令豬皮更化，十分鐘過後，白皮豬已變成紅燒豬，果然快手！
熱賣2
上海花卷食得多，但這碟港式花卷就第一次聽聞，正在奇怪之際，大廚捧着一碟有如日式魚片的菜出現，賣相非常特別。細問之下先知是大廚的自創作品，外層是用藥材扣過的豬大腸，內裏捲着透明的冰肉同鮮黃的鹹蛋黃。冰肉其實是用大量砂糖醃製過五至六小時的豬背肥肉，將肥肉捲着鹹蛋黃，最後釀入豬大腸內炸香，食時蘸上酸甜汁，味道鹹中帶輕微清甜，肥肉已做到入口即化的效果，外層豬腸香脆煙韌，有少許食炸大腸的感覺，但味道、口感豐富，值得一試。
熱賣3
我一向很抗拒在深圳食刺身，怕不新鮮。但老闆說這裏的牛肉都是由香港運到，所以一試。片片生牛肉都呈鮮紅色，每片都薄得透光，食時蘸上日式芥辣和豉油，全深圳只有兩間食店有得食，是舖頭的招牌菜之一。
其他推介
前陣子深圳興食香辣蟹，最近這股「蟹」風一過，食店老闆亞棠即時想出以港式避風塘炒蟹取代，避風塘炒蟹香港都有，有何賣點？原來乾坤就在香蒜粒當中，師傅注入新意，在炸香的蒜粒中加入脆卜卜的炸麫包粒，蒜粒夾雜着麫包粒，食蟹時有香濃蒜味又有香脆口感，食完蟹可以連佐料都一併食埋，惹味香濃！
月映百花台是梁師傅的另一原創作品，在滑嘟嘟的玉子豆腐上釀上鮮帶子肉和蝦膠，蒸熟後淋上以鮮蟹肉做成的琉璃芡汁，突出海鮮的鮮味，豆腐在蒸製時滲滿鮮蝦及帶子的鮮味，配合蟹肉汁，鮮上加鮮，味道清淡又有營養，鍾意清淡食物又要食得刁鑽的朋友不妨一試！
方榮紀雖然只做晚飯消夜時段，但開張短短兩個多月，已能做到日賺七、八千元的成績。有此佳績原來全靠老闆亞棠力求創新的精神，燒BB豬、港式炸花卷、避風塘炒蟹都是招徠客人的招牌菜，「以前深圳好興食香辣蟹，𠵱家熱潮已過，我打算力谷港式避風塘炒蟹，希望可以成為另一熱賣菜式。」有好概念亦要有好的師傅，亞棠專誠由廣東請來幾位經驗豐富的大廚主理廣東菜，又由澳門請來廚師專門負責做豬骨煲，確保水準穩定。
店名：方榮紀
地址：深圳市羅湖區華麗路集浩花園2樓
營業時間：4:00pm-6:00am