晚飯時，鄰座傳來數落香港的評論，閉嘴一聽，發現又是近來聽得頗多的憎惡香港、寧願移民的放論。這次移民的地點是一江之隔的澳門。夾住一塊陳皮煎雞的食客，以政經專家口吻議論，形容何厚鏵將賭場搞得活色生香、擺平了黑幫勢力、市面經濟有起色、文化生態比香港絢爛……聽得人真高興，香港有這樣一個鄰居，就算全城爆發禽流感，也有個快樂埠仔讓沉淪抑鬱的香港人躲一躲，走難去澳門，買醋來煲都應該比珠三角方便。
在飯店開幾瓶波爾多紅酒的食客，酒喝多了，將香港比作爛船，離棄沉船，天經地義。那位剔着門牙講手提的時髦阿嬸說得明白：錢沒得賺，就算有得賺，都沒以前那麼好景。中年男人答嘴：金雞既然沒下蛋，母雞還要養來幹麼。去邊度都得，至緊要雞照夾、紅照品。我偷瞟這些男女，像是偷聽着別人掟煲的原因。那個衰公破晒產，跟住佢實陀衰我，當然要滾水淥腳，換個大碼頭泊啦。如果我插嘴問，夫妻幾十年，難道冇感情嗎？對方一定嘴都藐埋，感情食西北風呀，香港玩完啦，乾晒塘，唔走等幾時，真係同佢有親咩。我語為之塞。香港，家陣又確係落難之時，唔撇佢，唔走佬，有情有義，穿膠花一齊捱，當家那位，會衷心感激嗎？會，至奇。