中大慈善健步行暨嘉年華會果然熱鬧，為中大慶祝四十周年打響第一炮。八方噚日去到現場，見到好多猛人校友、校董同中大友好去捧場，例如商界有鄭海泉、陸觀豪、呂志和，文化界及新聞界有古天農、張宏艷……重有三位不同時期嘅中大校長：金耀基、高錕、馬臨難得聚首一堂；加上校董會主席利漢釗博士、校董鄭維健、香樹輝等，真係墟冚。
九三年畢業嘅張宏艷同七九年畢業嘅古天農不約而同拖男帶女，同另一半齊返中大。張小姐一改豔麗女主播形象，一身便服、斜戴鴨舌帽，做完大會司儀，一落台就一手一個，拖實四歲女兒之之同兩歲細女JJ，又幫女兒攞雪糕，不過佢為咗保護兩位年紀尚幼嘅小千金，唔畀記者同佢哋影相，讀者惟有欣賞吓張小姐三母女嘅背影啦；同係中大畢業、高大有型嘅老公就默默做跟班，一家人簡直可以做模範中大校友家庭。
另一位校友古天農，個仔仔同佢一個餅印，太太黃秀英喺有線做記者時訪問古導演，喜結良緣，古天農重話籌備緊一個同中大有關嘅舞台劇。
三位中大前任現任校長中，以馬臨教授最少曝光，原來馬教授正埋頭寫作，包括自己嘅研究專長蛋白質化學，及個人回憶，咁佢有乜嘢難忘經歷？馬臨教授話一言難盡，八方惟有等佢出自傳啦。
傳真︰2623-9278
電郵︰
