呢幾日天氣回暖，下晝重好猛太陽，貝沙灣睇樓人士個個都要曬住排隊睇樓，唔知係咪熱得滯特別心煩氣躁，蘭西喺穿梭巴士內，聽到有闊太大嚷，話售樓處外露天地方排長龍，咁曬法重得了？情願唔睇返轉頭咁話，但係，山長水遠一場嚟到，即使想走，都要等好耐先有穿梭巴士搭，所以該名闊太只有一邊嘈一邊排隊齊齊曬。
發展商眼見不少準買家站在烈日下等待，怕曬親啲未來客仔，於是派出笑容可掬嘅靚女職員向參觀者派傘子，如此溫情的場面，蘭西當然攝入鏡頭。
另一邊廂，蘭西因為採訪可以直入售樓處，唔使乾曬，場內冷氣開放，重見到唔少售樓部靚女職員，當堂眼睛吃冰淇淋，成個人涼爽晒，正想舉機捕捉儷人倩影，誰知美人突然變臉，話唔想入鏡，爭論一番後重拂袖而去。與剛才在外親切可人嘅同事，大相逕庭。大家都係做嘢啫，唔使咁呀！
有謂樹倒猢猻散，鴻運地產突然結業，旗下嘅員工各散東西，有經濟實力嘅就暫時唞吓氣，否則都急急腳搵工。上個禮拜前鴻運粉嶺區經理區智禮過檔咗中原，於馬鞍山海濤居擔任分行經理。噚日喺大角嘴港灣豪庭售樓處，就碰上多位前鴻運分行經理，據講總共有七位經理入職，來自九龍及新界多個分行，重包括埋區頭。佢地話，新盤比二手好景，為搵食，當然揀做新盤穩陣。問佢哋關於追佣嘅事，大部份都希望追番條數，但係𠵱家最緊要開單搵錢，追佣嘅事，慢慢先算啦。
住宅物業買賣不斷萎縮，但商業樓宇市場就好似好好環境，中原、美聯兩間代理行紛紛增加這方面人手。
今個月美聯香港寫字樓部成立新組別，掌舵人劉志威相約一眾小記會面，蘭西自然係坐上客。據佢講，寫字樓代理生意尚有發展空間，所以公司開新組別，希望搶高市場佔有率，新組別共有十多個成員，已請了其中四位，來自五湖四海，經驗有深有淺，至於啱啱結業嘅鴻運地產，因為無商業部，所以暫無員工加盟。
拍賣會係筍貨集中地，一向都有捧場客，只要氣氛高漲，去貨率都高啲，搞手除要搵更多筍盤外，不時都要出啲新招引客。好似卓先拍賣行聽日就會喺尖沙嘴美麗華酒店搞住宅拍賣會，將會向首二百位入場人士，派發一百蚊超級市場禮券，搵唔到平貨都可以去超市入吓貨。此外買方重唔使畀佣金，而代理帶客成功買貨，更可得到二千銀轉介費㖭。
近排豪宅新盤搶晒鏡，中細價新盤都要搞搞新意思，吸引市場注意。市區上車盤大角嘴港灣豪庭，噚日就搵嚟美聯張錦成、風水師高萌禧同埋渣打銀行代表齊齊搞talk。銀行界負責講租樓好定買樓好，答案唔講都知一定係入市好啦，張錦成就講吓點睇個樓市，佢話未來供應有數得計，只要經濟氣候變動唔大，個市唔會差得去邊，綜合而言就係大致睇好。最好反應係講風水時段，不斷有市民發問，問嘅都唔係有關港灣豪庭風水，而係各人嘅家宅問題，好似有啲離題喎。
蘭西
電郵地址：
