阿仙奴喺英超聯再次拋離曼聯後，又要集中精神應付周三歐冠盃作客阿積士一仗，雲格賽後就話施文到時可以同A高爾一齊復出。不過，依我求大俠所見，泰萊已經可以獨當一面，長江後浪推前浪，雲格唔應該再浪費一位好門將。
阿仙奴大勝曼城一仗，泰萊整場表現的確唔差，三番四次救出對手射門，最後先至俾安歷卡破蛋，但對勝負無關痛癢。不過睇見泰萊失波後激氣非常，可見呢位二號門神比賽態度認真，好想表現自己，係「鬥心馬」。一位門將打起咗，應該繼續用佢，分分鐘會救到對手必入波；再睇番以前俾雲格重用過後，棄用嘅當打奧國門神曼寧加，兜兜轉轉去咗意甲弱旅拖連奴；噚朝上半場見佢吞咗AC三蛋後，信心盡失嗰樣，諗番如果佢留喺兵工廠，應該……。
大家重記唔記得雲尼斯達羅上周喺歐冠盃對祖雲達斯入咗波之後掟波衫？雲尼斯達羅唔使因為呢次行為俾球證黃牌警告，全靠接到波衫個球迷掟返畀佢，呢位曼聯前鋒亦好識做，第二日特登送上波衫答謝。
一般球迷有咁難得機會，肯定第一時間收埋件波衫，好似呢位球迷就好少見，抵讚！
卜比笠臣今季一直同傳媒講，話紐卡素重未夠實力向阿仙奴、曼聯挑戰，爭奪聯賽錦標。直至日前作客大勝列斯三球，呢位老人家都終於肯改口風嘞，佢話球隊可以諗吓今屆聯賽錦標。
其實，紐卡素今季愈踢愈勇，歐冠盃無兩個正選前鋒都贏波，所以卜比笠臣又真係唔使好似以前咁謙嘅。
曼城俾阿仙奴狂數一比五，領隊基瑾喺賽後就冇晒心機，佢讚對手有機會問鼎今屆歐冠盃錦標之餘，重好感慨咁話同「兵工廠」係兩個世界嘅球隊，認真悲哀。
不過，我求大俠就質疑基瑾點解會咁講，要怪就怪自己亂使錢，買已經冇乜進步嘅貴貨科拿都唔買個好後衞，搞到隊波有前無後。
曼聯對保頓又失分，費爵爺賽後有無再踢波本就唔知，但係就賴咗警方以安全理由將比賽提前中午進行，搞到佢哋無足夠時間備戰喎。我求大俠就唔覺提前三個鐘開波會影響咁大，老費應該檢討吓隊波今季對住弱隊點解打得唔好重好啦。
不過，英超聯啲早場波成日利主隊，波友就真係要記住啦。