上周五晚又有突發新聞，美國紐約油庫設施大爆炸，相信唔少人即時聯想起恐怖襲擊，趙飛雲多個反應就係美股會上升，結果杜指真係倒升103點收市，報8018。
美股反彈相信唔只證實事件係意外咁簡單，應該係有無形之手支持。自從911事件後，係人都知道恐怖分子最易在股市賺大錢，傳言為咗唔畀佢哋得逞，有政府使出無形之手對付，911事件後美股大反彈有明顯手影，所以上周五睇見油庫爆炸，即時覺得美股反而會升。
不過純以技術走勢分析，趙飛雲上周五亦提過，杜指上周三及周四回吐，仍守住10日線，形態上只屬旗形整固，唔可以批死反彈完成。上周五杜指回升103點，破旗而上，重返20日線（現處7968）之上收市，短期關鍵阻力位仍係頸線8178，為好淡分水嶺。
美股上周五反彈對港股今日有幾大幫助暫時好難估，原因係上周五港股轉弱迹象相當明顯，睇嚟唔似大戶布下嘅挾淡倉陷阱，反而之前幾日有震淡倉迹象，趕散戶淡友落車後，上周五回復真面目。趙飛雲咁樣講，唔係因為本身揸咗恒指Put輪，主要係累積嘅市場感覺。
港股首個反彈阻力在10日及20日線9300水平，若今日升破收市，先沽一半9556止蝕，餘數以恒指升破9460作止蝕位。恒指9460為近期反彈頂部，若升不破，可伺機補回沽出的恒指Put輪9556。
趙飛雲