日本藝能界雖然一直都以陽光大男孩做偶像主流，啱晒我羅拉嘅口味，不過近排揭開啲日本雜誌，竟然發現新一代等上位嘅男星，統統選擇用同志look或者弱質美少年形象示人，唔通我羅拉一向情有獨鍾嘅陽光男優，不知不覺間已經變咗好out嘅非主流？
睇怕唔少冧開瀧澤秀明同今井翼嘅女fans，近排見到偶像嘅新形象都會心碎，你睇吓佢哋一個只係披住件褸，一個索性連衫都除埋，咁嘅合照肯定令人諗錯隔籬啦！唔知佢哋兩個係唔係覺得自己嘅人氣有下降迹象，所以想吸納多一班同志fans？
睇到呢張咁妖嘅相，就知成宮寬貴呢位哥仔好識得博出位！佢喺日劇《新高校教師》入面呃咗上戶彩去開房，無良到出汁。而現實中嘅成宮，啱啱出道就有傳佢同一個男老師同居喎，相信最有資格扮同志嘅都非佢莫屬嘞！
扮演超人高斯嘅杉浦，雖然個名叫太陽，但係佢影親相都好似乸乸地咁，嗰種嫵媚我羅拉真係拍馬都追唔上。阿太陽仔上年俾人陷害話佢打人，俾人捉咗返差館，好在最後都沉冤得雪，而且重即刻大紅㖭，算佢好彩！
又係一個因為拍幪面超人而上位嘅新仔，不過須賀貴匡其實已經二十五歲㗎啦！左等右等俾佢等到「龍騎」呢個角色，終於紅咗。不過睇完佢呢張咁出色嘅相，真係好難將呢個人同幪面超人啲咁正氣嘅劇集聯想埋一齊。