張栢芝與謝霆鋒分手後，近日成功翻𠝹舊愛陳小春，日前二人結伴到泰國享受日光浴，其間栢芝更穿上誘人三點式泳衣，在小春面前展露美好身段。昨日栢芝從泰國返港，只見她如沐春風，心情絕靚，但栢芝卻表示嫌開心時間太短。
張栢芝陪伴陳小春在泰國享受完日光浴後，昨日下午約一時四十五分先行返港，只見栢芝面頰曬至紅卜卜，心情看來甚靚，以誘人露腰裝束示人的她，大方展露珠片臍環及左邊腰身新添的紋身，非常野性。
露腰晒紋身印水紙
當栢芝發現現場有記者不斷拍其腰部紋身大特寫，她即時大發嬌嗔說：「唔好咁鹹濕好唔好呀？呢個係印水紙咋。」問到情人節時小春可有送她禮物，栢芝反問：「做乜送禮物畀我？我哋係朋友之嘛。」
至昨日下午四時許，栢芝換上一身純情學生妹的校服打扮，出席在清水灣三育中學舉行的新片《絕種好男人》記者會。對於與小春在泰國曬日光浴一事，栢芝有備而來地說：「去度假係真，着比堅尼係真，游水都係真。」那麼她與小春之間又是否「真」？栢芝一本正經地說：「同小春真係朋友，我唔會呃人，就算有男朋友拍拖都係好正常啫，今次係同公司同事旅行，一定、一定、肯定唔係男朋友。」
着起比堅尼似超模
而對於被拍下比堅尼泳衣照一事，栢芝不但沒半點怒意，還笑言自覺猶如supermodel。問到小春會否介意被拍下泳褲照時，栢芝表示沒有問過小春。栢芝又說：「今次去旅行開心得太短，只曬得兩日太陽唔夠，我有游水㗎，只不過佢哋影唔到之嘛。」
有記者問栢芝以比堅尼示人，是否有意轉走性感路線？栢芝笑說：「因為我係圈中人，先至俾人覺得性感啲之嘛，好多人都係咁着㗎啦，冇理由游水打呔啫！我只係做正常人做嘅嘢，唔介意傳媒影相，游水其實係一件好正常嘅事。」
記者再追問她是否與小春拍拖時，栢芝矢口否認道：「肯定唔係，我哋同公司，大家係朋友，唔需要解釋太多。」
故作神秘唔講原因
問栢芝為何伸手摸小春腰身時，她故作神秘說：「秘密！你哋問番小春，我怕俾佢鬧。」問栢芝覺得小春身形如何？她表示不懂評論人家身材，但被問到小春的泳褲尺碼時，栢芝即反問道：「我點知呀！」
問到栢芝與小春可有發展機會？栢芝斬釘截鐵地說：「冇發展機會，我唔想拍拖，真係好唔想，一來我忙於工作，放工返屋企睇吓碟好舒服，唔使有男朋友，同屋企人、朋友玩已經好開心。」有指霆鋒不欲回應栢芝與小春同遊泰國一事，栢芝即笑着反問說：「做乜要理我啲嘢啫！」
採訪：陳月萍、汪正文 攝影：甄朝健
