章小蕙噚日凌晨一點半左右，打扮到花枝招展咁去楊其龍間dragoni蒲，雖然踏入十二點之後係佢前夫鍾鎮濤嘅五十歲生日，但馮仁昭橫睇掂睇，佢都唔會係同前夫慶祝，而章小蕙離開嗰陣係單拖一個，所以未有機會一睹佢成日講嗰啲護花使者嘅真面目。
而前日馮仁昭同佢傾開偈，佢澄清追求緊佢嗰位研究生男友唔係着54號Armani，嗰位54號Armani已經係過去式，𠵱家嗰位研究生係着54號軍褸先至啱喎。
問章小蕙情人節點過？佢話：「情人節前十六小時，我同54號軍褸一齊過，因為我哋大家都係喺紐約等轉機，我飛去倫敦，佢就飛去加拿大。」
另外，章小蕙重話佢去紐約嗰陣，曾經同佢代理嗰隻化妝品牌嘅化妝師LindaCantello見過面，佢哋又講化妝又講星座，重講埋美伊開戰，真係多話題。
亞視已經好耐冇出自製嘅劇集，佢哋最近搵咗馮寶寶助陣，拍咗一套苦情戲《萬家燈火》，套劇喺今晚推出，噚日一班演員坐電車去到銅鑼灣鬧市宣傳，其中珈潁重特登着件露臍背心，認真賣力。咁啱嗰段時間有一大班外籍女傭喺銅鑼灣遊行，搞到成條街好熱鬧，好多菲傭爭住同寶寶姐影相㖭。
王賢誌同李克勤成日撞衫，撞嘅次數有成三、四次咁多，前晚王賢誌終於同克勤同場演出，佢同丘凱敏一齊做《加港星輝耀頤康》嘅司儀，為免撞衫，佢專登將原本套AnnDemeulemeester西裝加多條毛。至於丘凱敏套裙係DorianHo贊助，佢怕走光，就黐到成身都係膠紙！
呂珊噚日喺黃大仙嘅騰龍墟唱歌，由於噚日係假期，所以都有唔少一家大細嚟捧場，而呂珊所唱嘅都係一啲經典舊歌，好啱啲觀眾口味，令到佢得到唔少嘅掌聲，呂珊話得到咁多掌聲覺得好開心，所以唱得特別落力。
蕭正楠噚日喺海港城宣布擔任韓國汽車牌子Hyundai嘅代言人，酬勞有成三、四十萬，佢會影六輯廣告相，包括着西裝同運動衫，而其中有個動作要踢腿，蕭正楠話踢咗成四、五十次，好彩冇受傷，而間汽車公司就先送咗架價值七萬嘅私家車畀佢，遲啲重會送多架七人車畀佢㖭。
何韻詩噚日喺鯉魚門廣場出席活動，問佢係咪有份演出由古天樂監製嘅電影《豪情》，佢話都係睇報紙至知可能要做舞小姐，佢話：「我會拋低我嘅玉女形象去試，如果個角色有得發揮都冇所謂，不過佢哋搵我都幾奇怪，我嘅身材都受人賞識，真係幾受寵若驚。」
