最近豪宅樓盤一齊開出，有銀之人好唔得閒，俾啲經紀call到爆機咁滯，F師奶久居西半山，離開數碼港唔算太遠，一班太太團近日起哄，猛話要去參觀貝沙灣，一個主要理由就係俾啲廣告迷惑，頂唔順啲排山倒海嘅報紙電視台廣告。
F師奶與太太團特別喜歡廣告嘅法國情調，會所設計；睇完樓盤之後，幾位阿太立即話要落叠，F師奶以前做過生意，買樓冇咁衝動，要執齊資料返屋企睇真吓。一睇就打電話問左丁山：「喂，貝沙灣唔係九九九年期噃，只得五十年咁短，即係由入伙日起計，得四十六年期咋，買唔買得過？」
左丁山知道答案，不過為免誤導F師奶，首先問清楚律師洪，答案一如所料：「九七後新批土地，年期一律計到二○四七年，數碼港如是，西九龍、將軍澳亦如是，所有新界樓都係。只有舊樓拆建，原有年期先至會長啲。我自己層樓，就係九九九年期嘞。至於二○四七年後會點，睇到時特區政府嘅政策，現在冇人知，只知有兩個極端，一個就係到時唔使補地價，照樣延期，譬如話五十年；另一個就係全部收歸國有！喺兩個極端之間，當然有好多種計算補地價嘅方法。」
於是話番畀F師奶聽，叫佢買得就唔好驚，橫掂香港人咁多存款（任總話港元存款有萬八億，未計外幣存款），有錢阿太買樓收租邊使諗得咁遠。