我哋寫過無數開倉報道，甚少介紹百貨公司大減價，皆因以為百貨公司減價幅度唔大，冇乜吸引力。近日知道，全線先施百貨將於明日開始，一連七日將進行盤點清貨大減價，減價幅度低至3折有多，真令小記側目；其中以電器最抵買，另外運動服飾、廚房用具、旅行篋等售價更加吸引。由於某些貨品數量不多，而且百貨公司嘅貨品一直有保證，起碼唔會加後再減扮大減價，同時亦唔會有水貨出現。所以，各位愛執平貨嘅讀者，記得㩒定錢，等聽日去掃貨喇！
記者：梁煒健 攝影：陳偉強
ImageGirl：NatalieWoo
以前買個日本品牌嘅雪櫃都要三、四千蚊，但𠵱家買個意大利製造，就二千幾蚊搞得掂。呢款意大利「徹里尼」雙門環保無霜雪櫃，尺寸夠晒巨型，有22吋闊、61吋高及24吋深，容量更大至可以容納280公升，認真厲害！大減價平咗$1,100，又係時候換個大雪櫃嘞！
型號：「Cellini」GCR280W
原價：$3,290
特價：$2,180
貨量：充裕
呢款CelliniCS10W抽油煙機機身只得4吋厚，十分輕盈，兩個抽氣扇轉速可達每分鐘1,500轉，吸力算強；加上今次盤點大減價差不多平咗50％，好過買部大陸機啦！尺寸為28吋闊、4吋高、20吋深。
型號：「Cellini」CS10W
原價：$998
特價：$499
貨量：充裕
早餐有鋪癮食麫包，尤其想烘埋底，最方便莫過於家中添置個多士爐。呢款日本三洋推出嘅多士爐，外形夠流線型，烘麵包程序除了手控外更有時間掣，最耐可達到9分鐘，但相信一塊麵包烘咁耐就乜都燶晒咯！呢個多士爐現今減至一半，相信應會幾受注目。
型號：「SANYO」SK-PT750W
原價：$198
特價：$99
貨量：70部
一套三件嘅Buffalo廚具，包括一個直徑26厘米嘅8公升不銹鋼煲，一個直徑18厘米嘅2.1公升單柄不銹鋼煲，及一個利用五種鋼材混合製成嘅五層鑊。由於五層鑊內有兩層純鋼、兩層18/10不銹鋼，以及1層鋁合金製，所以煮餸時絕唔易流失食物之中營養。
型號：「Buffalo」BF510035+
PN2001-3+PN2001-4
原價：$1,778
特價：$598
貨量：120件
三月份係旅遊嘅Lowseason，好多人特別揀呢個月放假出外。今次盤點清貨大減價之中，我覺得一套三個嘅PoloClub旅行篋就至抵買。最大一個有32吋高、20吋闊、12吋深，Size較細嘅手拉篋，尺寸亦有22吋高、15闊、9吋深，去短程Trip帶少量衣服就最啱使。而方便大家攜帶東西上機嘅手挽袋，尺寸為12吋高、15吋闊、6吋深，間格夠實用。顏色有黑、深藍及啡色以供選擇。
原價：$1,100
特價：$338
貨量：充裕
若嫌以上三個旅行篋顏色平庸，顏色較男性化，相信紅色就必定啱晒女性要求。原本呢兩個袋係要分開買嘅，手提篋約有21吋高、14吋闊、8吋深，原價$380家陣減到$79；細小可攜上機嘅手挽袋，尺寸為15吋闊、10吋高、4吋深，售價$98，家陣兩件加埋都唔使$100。
原價：$478
特價：$99
貨量：充裕
睇數量只得17部就知道呢部細細部嘅三洋牌吸塵機賣得幾掂。雖然體積細小約有14吋高、9吋闊、8吋厚，容易收藏，但其吸力依然唔嘢少，有1,100w，屋企細細就最啱使。
型號：「SANYO」SC-N200
原價：$515
特價：$338
貨量：17部
今次減價貨品之一嘅ACL子母機室內無線電話，接收範圍有300米以上，母機本身有10個頻道，收得唔清就會Scan，有20種響鬧聲，又有90組電話記憶。由於子機分開擺放，一般可使用8小時；另外，母機可允許一拖四子機，但今次特價貨只有一拖二。
型號：「ACL」ACL-3039
原價：$698
特價：$396
貨量：充裕
掃貨攻略
盤點清貨由2月25日至3月3日止，其間不斷有新貨添入減價，約兩、三日一次。雖則今次以家電為主，但其實有不少男女運動服飾亦有得減，Discount亦頗大；例如Renee女裝長袖T恤，由$139減至$49一件，另外亦有DVD機、洗衣機、床單被袋減價，可謂貨色齊全！
掃貨點：全線先施百貨
電話：25442688
盤點清貨日期：2月25日至3月3日