響今屆日內瓦車展上，來自意大利嘅愛快車廠亦不甘示弱，將會展出多部新車及概念車，當中最能惹來車迷關注嘅，會係有望於今年年底推出嘅GTCoupe；有興趣嘅朋友，就記住唔好錯過今日嘅介紹喇！
GTCoupe係由BertoneStyleCentre負責設計，而造型亦甚具跑車氣息，其中極為流線型嘅車身線條，就最能將呢個特點展露出來。引擎配搭方面，廠方會為其配用上由156車系，所移植過來嘅1.8公升T.Spark引擎（馬力140匹），及2.0公升JTS引擎（馬力165匹），另外用家亦可選擇頂級GTA跑版所配用嘅3.2公升V6引擎（馬力250匹）㗎！但由於廠方未有公布車廂布局嘅資料，故有待車展正式揭幕後方能確實其配搭。
向來備受追捧嘅愛快Spider，新一代版本亦會於車展會場上展出；雖然造型看似沒有多大改動，但就配用上全新鬼面罩，襯以由四盞圓燈組合而成嘅頭燈，以及全新16吋合金胎軨配搭，一派跑車形象完全表露無遺。車廂配搭亦略有修改，駕駛席位置較前來得低矮，輔以闊大擋風玻璃設計，視野較前來得更見廣闊，當然唔少得重有開關容易嘅篷頂啦！廠方亦為其安排有2.0公升JTS及3.2公升V6引擎，當然唔少得重有能輸出150匹馬力嘅2.0T.Spark型號啦！