在溫哥華看電影都幾冇得頂，因為戲院靚。位於列治文市的SilverCity是一整座的電影城，十幾間戲院每間都有UA金鐘A院咁大，銀幕又大又乾淨，音響設備靚聲都冇倫，座位又闊又舒服，咁嘅環境之下睇齣好戲，無上享受。
北美洲一向沿用不設劃位，先到先得的坐位方法。觀眾早十幾分鐘便開始入座，早到者先佔去大堂正中無敵海景靚位，遲來者遇着客滿，情侶都可能要分開坐。
觀眾大多在熄燈前已經坐定定，大家非常尊重睇戲呢件事，睇咗幾齣戲，未聽過有電話響。在靚戲院睇預告是一件賞心樂事，X-MEN2令人期待，畫面非常豐富，重有咁多個超人睇，務求令觀眾覺得抵睇。電影公司為推廣X-MEN2兼順道多撈一筆，推出X-MEN1.5DVD，內裏多收錄了大量X-MEN1的被刪剪片段及X-MEN2的優先披露，百分百的生意經。
美麗的美琪賴恩在大銀幕上已呈老態，這次主演的不再是愛情片，而是講述她如何訓練造就一個黑人拳手的故事，預告片的感覺很勵志。個子不高的李連杰氣定神閒地一腳踢中高大鬼佬個頭，觀眾睇到拍晒手兼吹口哨，李連杰在他們心目中有能人所不能的地位。
在北美洲到戲院看電影並非只是看電影，那是一種LifeStyle，香港電影與荷李活電影有距離，但其實香港土產戲院跟西片戲院有更大的距離，若然戲院的設施不是值回票價的話，想不通為何不乾脆在家看DVD。