郭晉安憑演「阿旺」一角終告捱出頭來，作為其另一半的歐倩怡（Cindy），當然戥男友高興，不過Cindy坦承兩人拍拖四年來，曾出現感情危機，原因是比她年長十五載的阿旺，友情排位比愛情重要，故常令Cindy生氣，而Cindy更曾另結新歡，但風雨過後，今天的她已認定阿旺為終身伴侶。
現年三十八歲的郭晉安與二十三歲的歐倩怡拍拖將近四年，亦同居了好一段日子，二人在情路上一直看似無風無浪，但實際上他們曾出現過分手危機，年齡和思想上的距離是最大問題，而且也試過有第三者闖入兩口子的世界內，跟阿旺拗手瓜。
日前Cindy在銅鑼灣接受本報記者訪問時，對於她與阿旺的感情，她很坦白地說：「我同佢年齡相差十五年，之前我好𡃁妹，對好多事嘅處理方法，都令佢覺得好天真，我諗每一對情侶都一定有嗌交，嗌得多嘅時候，就會講不如分手罷啦，大家衝動到唔理對方，一、兩個禮拜唔講嘢都試過。」
冷戰至如此田地，Cindy亦坦承曾與阿旺出現感情危機，她說：「喺發生華星事件（與華星唱片解約）之前，危機出現過，我唔識得同佢溝通，佢喺工作上有乜解決唔到，佢唔會問我意見，寧願問身邊啲好朋友，好多時都係佢處理完，我至知。當時我都唔開心㗎，但我冇諗過去檢討自己，覺得一定係佢有問題，佢重視朋友多過我，我成日發爛渣，又不停將責任推喺佢身上，係男人都會嬲啦，諗番轉頭，自己真係唔應該。」
娛樂圈誘惑多多，俊男美女多的是，Cindy不諱言確曾有第三者出現，她說：「曾經有個幕後人追過我，坦白講，霎時衝動係有，始終新鮮，但我好快就搞清楚自己鍾意邊個，唉哎，好骨痹，救命呀！」那阿旺又是否一直對她像桄榔樹一條心？Cindy只笑說：「咁要問佢啦。」
而Cindy因年前經歷了華星解約事件後，人也成熟起來，她說：「以前同安仔相處，我會着重一個玩嘅伴侶多啲，但係人好難避免面對困難，我會不停提醒自己唔好停滯不前。𠵱家同佢嘅關係都進步咗，佢喺工作上都同我一齊分享，我好珍惜𠵱家擁有嘅感覺。」問到阿旺曾否向她求婚？她卻笑得合不攏嘴，接着說：「唔好咁露骨啦，臉紅喇，我有諗佢係我終身對象，𠵱家大家溝通得好暢快，互相都好信任。」
