「伸手助人協會」噚日喺銅鑼灣時代廣場展開義賣曲奇，除咗請到一班明星及立法會議員范徐麗泰、李柱銘、李華明同劉炳章，不在嘉賓名單上嘅馬會主席夏佳理中途失驚無神現身，着上圍裙賣埋一份。
原來「伸手助人協會」執委主席夏安麗（JohannaArculli），正係夏佳理太太。「老婆叫到，點敢唔嚟！」於是堂堂一個馬會主席，不時「烏」低身𠱁小女孩買三十五蚊包嘅曲奇同公仔。夏太則行嚟行去為丈夫補充曲奇，重時不時講句：「Darling,carryon!（打令，加油啊！）」
夏主席聽咗精神百倍，重即時「認出」一位路過嘅新地高層老友，呢位老友點好意思咁孤寒，惟有進貢五百大元。轉頭夏主席又撞見另一位老友，呢位「受害者」重慘，俾夏主席見到銀包張一千蚊紙，於是夏主席兩包餅就賣到千五蚊！
有夏佳理呢位超級外援，唔怪得一個下晝，淨係靠喺銅鑼灣賣曲奇就籌到六萬幾，成績好過舊年。
（圖）夏佳理同太太一齊義賣曲奇，遇到兩位老友大手筆幫襯。
傳真︰2623-9278
電郵︰