近年車壇興起嘅一股SUV熱潮，似乎未有減退迹象，而新車款亦愈出愈多，就連日產亦推出一款以年輕化、實用性強掛帥嘅X-Trail來湊熱鬧；究竟用家們對其有何評價呢？我哋今日特別搵嚟車主Wallance，為大家細數佢對X-Trail嘅感覺，相信你睇完今日呢份用家報告之後，會發現X-Trail唔止係一部SUV咁簡單，就連音響設備同空間感等各方面，亦要比同級車來得優勝呢！
記者：黃凱穎
攝影：陳穎
Wallance約於半年前購入嘅呢部日產X-Trail時，係以一部水貨豐田Harrier作座駕，而佢另外重有兩位朋友亦以後者作座駕；不過，兩位朋友嘅愛車都相繼被偷去，最後連Wallance自己一部亦遭賊人光顧，不翼而飛。故此響佢再選購新車時，除考慮汽車造型之外，重會顧及是否屬熱門被偷車款，經過詳細考慮同比較之後，佢就選擇咗日產X-Trail。
Wallance表示喺選擇X-Trail之前，其實都曾到汽車陳列室，睇過富士Forester及本田CR-V，並曾將之作出比較；但發現X-Trail一台2.5公升偈嘅180匹馬力，算係同級車中輸出最高，就連空間感亦明顯較同級車來得更好。「我經常同朋友返國內打Golf，揸住部X-Trail除可以接載3至4位朋友之外，另外重可以運載4套打Golf用嘅裝備去落馬洲轉車；當初揀買邊款車嗰陣，都有計算過能否將打Golf嘅裝備放入車廂，經過比較之後，就發現X-Trail不但能容下多套Golf裝備外，就連乘坐空間都要比同級車來得闊落舒適呢！」
車子本身擁有兩種模式供駕駛者選擇，Wallance發現喺一般情況下，其前輪驅動嘅駕駛模式已相當夠用，而下雨天時一套四驅系統便會大派用場。「X-Trail嘅操控表現會較豐田Harrier來得靈活，因為我屋企嘅停車場空間比較狹窄，以前每次揸車返屋企都要相當小心，如果唔夠精神的話，就會索性將部車擺響家門路邊就算；但家陣呢部X-Trail車身比較細小，而且重好靈活，出入停車場明顯較前方便得多。」
Wallance先前嘅一部豐田Harrier屬水貨車之餘，兼且重係全新車，但不知為何經常要作出維修，而佢朋友嗰部Harrier亦有相同情況；相對於佢現時所擁有嘅X-Trail，就再無呢個問題出現。同時，佢又覺得代理維修價格及服務水平絕能令人感到滿意，加上維修服務中心以24小時營業，無論係將部車送去做檢查保養或取車，絕對稱得上係方便呢！
X-Trail嘅造型，可算係眾多SUV中較有前衞感嘅一部，Wallance笑說佢買車時第一樣要考慮嘅地方，當然係車子本身嘅造型設計：「我鍾意X-Trail車頭同車身嘅線條感，相對於富士Forester同本田CR-V，佢會來得較為年輕及富美感；加上車廂內設有一大型天窗，揸車嗰陣會畀到人有一種舒暢嘅感覺。相對於駕駛普通私家車，我本身亦曾擁有一部寶馬3系轎跑車，但𠵱家我會鍾意X-Trail畀到我嘅開揚駕駛感覺；因為佢車身較高，駕駛者視線會明顯來得更遠同廣闊，無論係轉線或長途行車都有莫大裨益。」
於2001年10月初抵港嘅日產X-Trail，一直憑住其極富年輕活力感嘅造型，以及寬敞闊落車廂空間而備受車迷追捧；就連一台2.5公升直4偈所迸發出嘅180匹馬力，亦叫人對其留有深刻印象。
售價方面，初推出時為$269,980，但現時只售$239,800，從而令X-Trail更能增添有多一份競爭力呢！
引擎：2488cc直4DOHC
馬力：180ps/6000rpm；
扭力：25.0kgm/4000rpm
尺碼：4510×1765×1750mm；
軸距：2625mm
車重：1490kg；
新車售價：$239,800
（合誠汽車28035333）