老牌茶餐廳，不似集團式經營的茶餐廳，人舊、物舊、食物種類也千篇一律。三點三，奶茶配蛋撻，咖啡配西多士，指定動作。啜口煙，歎報紙，刨馬經，坐上一天半日，沒人會給你白眼。總覺得在老牌茶餐廳做「指定動作」，人舒服點，一杯咖啡、一個蛋撻，也來得好吃點。
老闆何伯伯話當年：「56年，金鳳喺太源街開張，8年前先搬嚟春園街。」搬遷，曾想過離開灣仔，另覓新址，卻捨不得一班老街坊：「講真㗎！好多街坊都叫我留低喺灣仔，話唔捨得金鳳嘅出爐蛋撻同雞批喎！」新舖比舊舖細一大截，生意一樣好，但何伯伯堅持不做夜市，每晚準時七時關門：「咁辛苦為乜？做人要知足，生意夠做，養得起自己養得起班夥計咪算數囉。」
街訪至捧蛋撻雞批
蛋撻（$3）1盤36個，一日焗差不多15盤，至少賣400個；火腿餡雞批（$5），每日也至少賣12盤。
鮮油麵包
菠蘿油（$4）、鮮油餐包（$4）之所以好味，全靠那片鮮牛油，何伯伯說：「用罐頭牛油，簡直浪費咗件麵包。」
無冰咖啡茶
絲襪奶茶咖啡（熱飲$11，凍飲$13），金鳳的凍飲無冰，奶茶咖啡放涼後直入雪櫃急凍，份量十足兼原汁原味。
食客之言
范小姐：「一日唔嚟過金鳳，梗係覺得周身唔聚財。」
店名：金鳳茶餐廳
電話：25720526
地址：灣仔春園街41號地下
營業時間：6:45am至7:00pm
老闆娘小黃好客、愛說話，但一登二樓雅座，人卻不期然靜起來：「人客嚟我呢間53年老牌冰室，就係貪呢度夠靜，無謂打擾人。」一瞥，臨窗一排卡位，坐着吞雲吐霧的老伯伯、做筆記的學生、歎報紙的西裝友、看連環圖的地盤佬，這種靜，最令人舒服。
日賣100碟焗排骨飯$43
飯先炒底，焗新鮮排骨，賣相欠奉，但味道一流，最高紀錄日賣100碟。
珍肝炒麵$36
師傅好心機，普通一碟雞膶、雞心、雞肫炒麵，雞肫切成花狀、蝴蝶形薑片、飛鳥形蘿蔔片，色香味俱全。
食客之言
杜生：「食過翻尋味，我專登喺尖沙嘴過嚟美都，為咗食呢度嘅排骨飯。」
店名：美都餐室
電話：23846402
地址：油麻地廟街63號地下
營業時間：8:00am至10:00pm