儘管香港市道唔係咁好，但係「食」亦有一定嘅市場，而面對今日的競爭，好多商品都要以包裝來突出形象，傳統嘅茶餐廳亦唔例外，除本身食物要有一定「食力」外，包裝亦愈來愈重要，所以近來多咗好多「豪裝」嘅「摩登茶餐廳」，今日就同大家睇吓幾家充滿特色嘅茶餐廳新貴。
茶餐廳可能係出自地道香港文化嘅關係，所以一向以來總畀人一種講求效率嘅感覺，除咗喺食物出品速度上引證得到外，大部份茶餐廳為咗做多兩轉生意，都會搞到啲坐位迫迫夾夾，慌死你會喺度打躉，要你用最高效率食完就走，點知原來到咗二十一世紀經濟不景嘅今日，竟然有人反其道而行。
「輕鬆一下」開業4個多月，唔使點樣宣傳，已經有鄭則士、張栢芝、Cookies、狄龍、鄺文珣等幫襯過，據聞佢哋都係因為喺門外經過，俾入面乾淨嘅環境吸引而自動獻身。小記採訪當日，就遇到靚女蒙嘉慧喺度午膳。始終藝人係公眾人物，要顧形象，太「Cheap」嘅地方，唔係咁方便出現嘅。
呢度裝修得咁企理？原來老闆覺得香港人生活緊張，想開一間可以畀人Relax嘅食肆，而食方面就覺得以茶餐廳夠快又夠多元化嘅經營方式最為理想，但佢又覺得傳統茶餐廳太過迫夾，所以決定用高級嘅裝修，加入茶餐廳運作，等客人入到嚟可以填飽個肚之餘，重可以輕鬆一下。
香港寸土尺金，茶餐廳座位通常較迫夾，但呢度有4千幾呎，共180個座位，負責人話只要平均每個時段都吸納穩定人數已經有得做，所以佢哋認為座位舒服啲都無所謂，而且尖沙嘴係遊客區，唔做好啲，怕失禮香港，因此亦吸引到唔少遊客幫襯。
特製「五香牛肉担担麵」（上$29），上海麵搵麵廠特製，麵質爽滑，浸過湯都唔會發脹糊口，全港只有呢度同葵涌總店食到。而「北京醬蹄」（$35）係最多傳媒介紹過嘅鎮店之寶之一。
呢度熱飲$10，凍飲$12都係大大杯，比一般茶餐廳大，而呢兩杯係好特別嘅「奶茶紅豆冰」（前）同「鴛鴦涼粉冰」（後），各$15。
食客意見
喺附近返工所以幾乎隔日嚟，鍾意呢度光猛乾淨，凍熱飲大杯，食物都有四粒星。
店名：輕鬆一下
電話：31136388
地址：尖沙嘴金巴利道25號長利商業大廈地下
營業時間：7:00am至2:00am
近來經濟差，似乎多咗人返屋企食飯睇電視，連帶收視率都好咗啲，尤其夜晚啲電視劇。偶爾想出街食吓飯，又想追電視劇，點算？
嚟天后中央圖書館附近嘅「帝悅粥麵餐廳」啦，裝修唔只比一般茶餐廳光猛舒服，而且以電視多見稱，一入到去，就見到佢哋嗰部價值四萬嘅48吋等離子電視，而且負責人阿Joe，重驚有啲人睇唔到，更喺每個卡位裝上7吋小型LCD電視，等食客就算落嚟食晚飯，都唔怕無電視「做餸」。
原來廚房出身嘅老闆阿Joe，對食物一絲不苟，而且選料嚴謹。呢度有幾款招牌海鮮粥，粥底夠綿兼鮮到你唔信。
鎮店兩大名粥「招牌竹笙膏蟹粥」每窩賣$108，「北海道紅龍蝦粥」賣$72一窩，味道極鮮，為保持質素新鮮，每日只限量發售。
用正老雞火腿熬上湯嘅「紅燒竹笙雞絲翅」，只賣$30，係好多附近中產人士嘅例湯；最抵死係一隻「足料裹蒸糭」賣$32，貴過食翅。
食客意見
方先生一家：呢度嘅常客，食嘢囝囝話事，佢最愛粟米斑塊。
店名：帝悅粥麵餐廳
電話：25043080
地址：銅鑼灣摩頓台13-15號地下
營業時間：8:00am至12:00pm
由明星做老闆嘅明星店，當然亦希望舖頭可以明星效應盡快上位賺錢。要做到明星效應有好多方法，例如搵明星做座上客，又或者店舖由名師設計，甚至連Logo都由名師主理，總之就要將佢包裝到好似明星一樣，做到令人眼前一亮，明星效應就算成功，而呢間充滿21世紀風味嘅摩登茶餐廳，就有晒以上成為「明星」嘅條件。
「冰室」係早期茶餐廳嘅其中一種稱呼，因為多數開喺舊式屋邨嘅關係，畀人一種好地踎嘅感覺，隨住好多舊屋邨拆卸，冰室呢個名稱，亦漸漸喺大家嘅記憶中淡化。但呢間冰室望落去相當高級，唔少人都知，佢嘅老闆之一係「獎門人」曾志偉，而呢間已經係第三家分店，佢哋將冰室用21世紀嘅前衞包裝，以全新形象復活。
呢間分店，同之前嘅風格好唔同，兩間舊店係商場舖嘅關係，食肆感覺會重啲；但呢間係街舖，大門前有落地玻璃，設計更有情調。喺落地玻璃前嘅雙人位，同埋U形卡位，就係為咗迎合年輕人鍾意吹水而設，而入面嘅氣氛，營造出嚟嘅感覺，畀情侶談心更加一流。
食客意見
陳先生：經常幫襯中環店，鍾意呢度嘅環境，推介起晒骨嘅淨肉海南雞飯。
店名：奇華21世紀冰室
電話：23144232
地址：尖沙嘴亞士厘道31號九龍中心地下A室
營業時間：12:00nn至12:00am