上個禮拜五個市終於企唔住，一日跌成百四點，前幾日個市挾上去，都只係有幾條魚毛蝦毛游入個市，大市升都只係靠期指頂住。明知個市升唔到，班大戶就一於將佢造番落嚟，有行家話，恒指要跌到9000樓下至有得諗。
上星期五唔止個市跌得緊要，就連一啲平時無乜郁動嘅股份都跌到瞓喺度，就好似隻香港葯業（182）咁，上星期五單日跌超過5成，差唔多以全日低位收市。淨係睇個跌幅，重以為係俾股票行斬倉，但奇就奇在嗰日成朝早都只係得9單成交，合共成交咗215萬股，但下晝一開市就俾人隊低五成七，成交量只係去到千七萬股左右，即係相等於發行量嘅1.2%。
聽市場朋友講，話說之前一個按咗倉嘅大戶，因為其他貨停咗牌又找唔到數，結果就俾人沽隻香港葯業，但好彩就係跌落嚟嗰時重有其他大戶出嚟頂住，所以隻股先跌得冇咁慘。不過好似話重未沽晒，所以下個禮拜可能重有得跌，如果各位自問唔係銅皮鐵骨又或者刀槍不入嘅話，就千祈唔好諗住執平貨，費事到時偷唔到雞蝕執米。
順帶一提，上次曾講過嘅亞洲鋯業（395）已經升到個三樓上，朋友話落咗嚟嗰班大陸錢重未炒完隻股，不過就要停一停透透氣。由於隻亞鋯有打仗概念，如果美國佬真係打伊拉克嘅話，班大戶一定會想辦法將隻亞鋯踢到飛天。雖然美國可能要去到3月中先會開戰，但有消息話隻股喺未來幾個星期好有機會到個半樓上，重話如果下個禮拜回番啲就要追貨，否則唔知要等幾耐先有另一班順風車。各位信唔信就自己諗啦。