英超聯熱刺對富咸場波，雖然喺周一先至打，不過就新聞多多，除咗富咸嗰邊因財困而軍心不穩外，熱刺呢邊亦鬧前鋒荒，搞到領隊荷杜要即刻出嚟話羅比堅尼嘅傷唔多嚴重，唔需要長唞。
有報道話熱刺聯賽首席射手羅比堅尼膝頭哥韌帶受傷，要唞六星期，搞到隊波剩番老將舒寧咸同埋「廖化」杜靴迪兩個當「弗」前鋒，令士氣大受影響。不過，荷杜就出嚟闢謠，話羅比堅尼只不過係打唔到嚟緊兩場聯賽，叫大家總要定。
另外，有小道消息話熱刺一直心儀嘅皇馬前鋒摩連迪斯，終於肯響夏天加盟，但首要條件係熱刺要攞到下季歐洲賽資格，而皇馬教練迪保斯基更承認喺上星期嘅歐冠盃同摩連迪斯吵嘢，咁睇嚟摩連迪斯真係有機會走頭。不過遠水不能救近火，喺羅比堅尼唔出得之前，我求大俠奉勸各位球迷，咪咁大注呀。
呢期特別興「更衣室風波」，話說國際米蘭喺上星期歐冠盃輸咗畀巴塞隆拿後，球員喺更衣室大吵，加上前鋒列高巴被逐後俾歐洲足協罰停賽三場，如果韋利有乜冬瓜豆腐，國米踢得歐冠盃嘅前鋒就剩番卡隆一個。唔知會唔會影響今日國米對皮亞琴察嘅表現呢？
講開意大利波，羅馬最令我求大俠失望，佢哋表現差，陣中主力托迪重當正自己係明星，喺小報報道佢同女朋友布拉茜感情有變後，竟出嚟闢謠。好心托迪低調啲，養傷後為羅馬搏殺好過啦！唔怪得喺《蘋果波經》總榜領先嘅波王，都睇死羅馬會輸畀烏甸尼斯！
法甲班霸巴黎聖日耳門，今季戰績每下愈況，最近重因經濟唔好，球會決定以陸路交通公具，取代一直提供畀球隊作客出戰用嘅私人飛機。佢哋堂堂首都球隊，搞成咁只怪球員教練唔爭氣，𠵱家佢哋喺聯賽排第九，要爭到來季足協盃資格都難，少咗歐洲賽收入，梗要開源節流！
華倫西亞前鋒卡萊爾個經理人費奧特最近威脅華倫加卡萊爾人工，如果唔係卡萊爾就會留喺球會到○五年約滿離隊，等佢哋一個仙轉會費都收唔到。呢招都幾絕，不過咁搞咪盞佢同球會面左左，以後更少出場機會嘅話，將來送都未必有人要啦！
果然不出我求大俠所料，湖人真係喺下半季鹹魚翻生，噚日佢哋贏咗拓荒者之後，正式首次進佔西岸第八位，睇佢哋𠵱家嘅氣勢咁鬼厲害，真喺好有機會喺剩下嘅二十七場波，過埋太陽同爵士升上第六位。講起湖人當然要提高比仔。佢只要喺下場對超音速再攞四十分，就可以平咗波神連續九場攞四十分或以上嘅紀錄。