著名Flamenco舞蹈家安東尼奧‧卡納萊斯同佢嘅舞蹈團，今晚7:30喺尖沙嘴文化中心大劇院為你上演《鬥牛勇士》及《佛蘭明高選粹》，值得留意嘅係團中靚仔新星JuandeJuan，舞技精湛，更被譽為安東尼奧嘅接班人。雖然反應熱烈到5場爆滿，買唔到坐位嘅朋友，今日上午10:00去文化中心重有企位飛賣，票價$100，謹記企位有限，要買趁早！
香港狗會喺灣仔會展2A、2B展覽館搞咗個狗展，讓你同你嘅愛犬由上午10:00玩到晚上7:00，入場費：大人$30、小童及老人$10、狗仔$30，記住最遲下午5:00要入場。屆時除可欣賞冠軍狗隻大展身手，場內更有十多個攤位，以優惠價售賣各類寵物用品。
心臟有幾重要？下午2:00至3:00旺角新世紀廣場星際廳（地下）有新城電台《家天下》節目一班主持，以短劇形式為大家講解護理心臟的重要性，唔使講梗有家燕姐同快慢必份啦，好似黃伊雯、Juno、BoyZ、Shine等一眾年輕歌手都話會嚟幫手宣傳。
由港台及房屋委員會合辦的「全港家庭增埴坊」，今日的主題為「開心日報家居環保香港好」，除一眾港台DJ外，更有歌星何韻詩、盧冠廷、鄭中基等到場與各位分享家居環保的心得。你都想分享？下午3:00至5:00到油塘鯉魚門廣場啦。
由現在至3月30日，每逢周日上環永樂街的上環假日行人坊，會有多個攤位以主題形式介紹區內的傳統行業，攤位開放時間為上午11:00至下午5:30，此外下午1:30至4:30更有免費魔術、雜耍等舞台表演。