馬主C一早約定，下個星期三到快活谷一齊食飯睇跑馬，並且聲言有貼士。馬主C少去馬場，久唔久去一次睇自己隻馬出賽，就問老友馬主有冇料到。呢類貼士信唔過，個個都話自己隻馬博梗嘅啦，你估實贏咩。不過馬主C言之鑿鑿，話要留意許怡馬房，姑且信住一半先。
講完馬，馬主C話銀行界傳得好勁，松哥在三月五日宣讀預算案之前，榮升父親階級，可能因為歡喜得滯，或者緊張得滯，兼且日又忙夜又忙，最近啲朋友見到松哥，都覺得佢個樣幾殘吓，面對電視鏡頭唔係幾好睇，松哥宜早啲上床休息，充夠電先至做場大騷。
松哥與國寶結婚，轟動朝野，馬主C有一個老友係人大代表，人大代表有內地朋友入中央黨校受訓，上課期間除讀必需課程之外，更有一啲個案研讀，等啲幹部討論啲專家所謂do's&don'ts（應做與不應做）。其中一個個案赫然就係「松哥娶國寶」！馬主C聽到，精神為之一振，追問人大代表：「個案有乜嘢微言大義？受訓幹部點樣討論？佢哋有乜意見？」人大代表笑而不言，點都唔肯講落去，只係講一句：「你估吓啦！」馬主C轉述故事，叫左丁山估，左丁山話：「估吓星期三許怡有冇馬贏，重易啲喎！」政治嘅嘢，複雜非常，中國政治更非我哋嘅常識可以猜度。香港人玩政治，重未夠班！